АҚШнинг 45-президенти Дональд Трамп мамлакатда ўтказилган Конгресс сайловларининг Республикачилар партияси учун муваффақиятли бўлганини олқишлади ва сайлов тадбирларининг дастлабки натижалари унинг 2024 йилги сиёсий истиқболларга оид режаларини эълон қилишга таъсир қилмаганини таъкидлади. Трамп, шунингдек, ғалаба қозонган республикачиларни «ўз одамлари» деб атади.
«Мен гўёки ғазабланганим ҳақида ёлғон хабарлар тарқалди, аслида бунинг акси. Мен қўллаб-қувватлаган одамлар жуда яхши натижаларга эришди», — деди Дональд Трамп Fox News Digital билан мулоқотда. У республикачи номзодлар билан фахрланишини таъкидлаб, келажакда уларни қўллаб-қувватлашга ваъда берди.
8 ноябрь куни Америка аҳолиси Конгресс Вакиллар палатасини тўлиқ таркибда, Сенатнинг учдан бир қисмини, 50 та штат губернаторидан 36 нафарини қайта сайлади. Ушбу сайлов натижалари Жо Байден президентлигининг кейинги икки йилига ва АҚШ сиёсатига, жумладан, Россия билан урушда Украинани қўллаб-қувватлашига таъсир қилади. Айни пайтда овозларни санаш давом этмоқда.
Дастлабки маълумотларга кўра, Трамп қўллаб-қувватлаган республикачиларнинг 216 нафари Демократик партиядан бўлган рақиблари устидан ғалаба қозонган (19 нафари ютқазган). Аввалроқ Дональд Трамп 15 ноябрь куни «жуда муҳим хабар» эълон қилишини айтган ва 2024 йилда Оқ уйни қайтариб олишга ваъда берганди.
Изоҳ (0)