Fransiya prezidenti Emmanuel Makron Tulon shahrida vertolyotlar uchishi va qo‘nishi uchun moslashtirilgan Dixmude harbiy kemasi bortida turib yangilangan milliy xavfsizlik strategiyasini taqdim etdi, u mamlakatga 2030-yilga kelib, “xalqaro maydonda muvozanat kuchi” va “Yevropa strategik muxtoriyati markazida joylashgan mustaqil, hurmatli, harakatdagi davlat” sifatida o‘z o‘rnini mustahkamlash imkoniyatini berishi kerak.
Makronning aytishicha, Ukrainadagi jangovar harakatlar “kelajakda yanada kattaroq ko‘lamli geosiyosiy ziddiyat uchun namunaga aylanishi xavfi bor”.
“Ukrainaga tinchlik qaytib kelganidan keyin, biz barcha oqibatlar uchun javob berishimizga, ya’ni yangi xavfsizlik arxitekturasini, yangilangan barqarorlik tizimini va qurol-yarog‘ ustidan nazoratni qurishimizga to‘g‘ri keladi”, — dedi u.
Prezident, shuningdek, iqtisodiyotni yangi sharoitlarga moslashtirishga, mudofaa sanoatiga turtki berib, mamlakatni “harbiy iqtisodiyot holatiga” keltirishga chaqirdi.
Bundan tashqari, uning qayd etishicha, Fransiya Yevroittifoqda yadro quroliga ega bo‘lgan yagona mamlakatdir, biroq u yadroviy tiyib turishni Fransiya va Yevropa “xavfsizligi asosi” deb atadi.
Avvalroq Fransiya Tashqi ishlar vazirligi Rossiya prezidenti Vladimir Putinning Ukrainadagi jangivar harakatlar G‘arbning ustunlikka erishish uchun olib borayotgan kurashi ekani haqidagi gaplariga qo‘shilmagandi. Parij uning gaplarida Moskvaning dunyoni “harbiy bloklar mantig‘i”ga qaytarishga urinishini ko‘rgan.
Fransiya tomoni aynan Rossiyani “xalqaro maydondagi asosiy beqarorlashtiruvchi kuch” deb hisoblaydi: u “Yevropa va butun dunyoga nisbatan shantaj mantig‘i”ni qo‘llaydi.
Putin dunyoda yuzaga kelgan vaziyat va Ukrainadagi maxsus operatsiyaga aynan G‘arbning xatti-harakatlari sabab bo‘lganini aytgandi.
Izoh (0)