Moskvada 21 yoshli talaba davlatga xiyonatda gumonlanib, hibsga olindi
7-noyabr kuni Moskvaning Lefortovo tuman sudi davlatga xiyonat haqidagi ish bo‘yicha G.K. Verdiyan ismli shaxsni hibsga oldi. Katta ehtimol bilan, bu astraxanlik 21 yoshli talaba Gleb Verdiyandir, deb yozadi BBC.
28-oktabr kuni Moskvaning Solnsevo tuman sudi Verdiyan familiyali shaxsga nisbatan mayda bezorilik haqidagi ma’muriy ishni ko‘rib chiqdi va uni 10 sutkaga hibsga oldi. Bu muddat 7-noyabrda tugadi, va o‘sha kuniyoq Verdiyan Lefortovo sudi tomonidan davlatga xiyonat haqidagi jinoyat ishi bo‘yicha hibsga olindi.
Lefortovo va Solnsevo sudlari matbuot xizmatlari ikkala ish ishtirokchisi ham Gleb Karenovich Verdiyan ekanini tasdiqladi. BBC ijtimoiy tarmoqlarda xuddi shu ism-sharifga ega 2001-yilda tug‘ilgan odamni topdi. Solnsevo sudi ham aynan shu sanani keltirib o‘tgan edi. Shu tariqa, Verdiyan davlatga xiyonat haqidagi ishlarning jamoatchilikka ma’lum bo‘lgan eng yosh ishtirokchisiga aylandi, deb yozadi BBC.
Nashr ochiq manbalardan topgan ma’lumotlarga ko‘ra, Gleb Verdiyan Astraxanda tug‘ilgan bo‘lib, Astraxan davlat me’morchilik-qurilish universitetida o‘qiydi.
Verdiyanning kursdoshlari uning hibsga olinganidan bexabar ekanliklarini aytgan, darslarda uni oktabr oxirlarida ko‘rishgan. Glebning onasi o‘g‘lining hibsga olingani yuzasidan izoh berishdan bosh tortgan.
Qayd etilishicha, Verdiyan aprel oyida “VKontakte”da qurol haqidagi guruhda maxsus operatsiya haqidagi videolardan biriga quyidagicha izoh qoldirgan: “Travmat (to‘pponcha) egalariga savol — uni sotib olish va litsenziya rasmiylashtirish shunga arziydigan ishmi?”. Unga hech kim javob bermagan.
