AQSH prezidenti Jo Bayden ma’muriyati Kiyev va Kongress a’zolarining iltimoslariga qaramasdan, Ukrainaga ilg‘or uchar qurilmalarni yuborishdan bosh tortdi, deb yozadi The Wall Street Journal amerikalik mansabdorlarga tayanib.
Pentagon Grey Eagle MQ-1C dronlarining taqdim etilishi nizoning kuchayishiga sabab bo‘lishidan xavfsirab, Kiyevning so‘rovini rad etgan. Shuningdek, bu Moskva uchun AQSH Rossiya hududidagi pozitsiyalarni nishonga olishi mumkin bo‘lgan qurol-yarog‘ni yuborayotgani haqidagi signal bo‘lishi ham mumkin edi. Bundan tashqari, Vashington agar dronlar urib tushirilsa, ulardagi texnologiyalar o‘g‘irlanishidan tashvishlangan, biroq bu xavotirlar qaror qabul qilishda hal qiluvchi bo‘lmagan, deyiladi xabarda.
Grey Eagle dronlarini ishlab chiqaruvchi General Atomics vakili kompaniyaga qaror haqida ma’lum qilinganini tasdiqladi, ammo tafsilotlarni oshkor qilishdan bosh tortdi.
17 nafar kongressmen sentabrdayoq ma’muriyatni Kiyevga Grey Eagle dronlarini taqdim etish masalasini ko‘rib chiqishni tezlashtirishga chaqirgandi.
Rossiya Mudofaa vazirligi Dneprning chap qirg‘og‘ida mudofaa pozitsiyasini egallash uchun Xersondan qo‘shinlarni olib ketganini e’lon qilganidan keyin, bu dronlarni yetkazib berishdan voz kechilgani haqida ma’lum bo‘ldi.
Grey Eagle undan ham mashhurroq bo‘lgan Predator dronining bir versiyasidir. Uning parvoz davomiyligi — 30 soatgacha. Dron razvedka uchun ham, zarbalar berish uchun ham ishlatilishi mumkin — unga sakkizta Hell fire raketalarini o‘rnatish mumkin.
Yozda WSJ AQSHning Rossiya Grey Eagle ilg‘or texnologiyalarini qo‘lga kiritishidan xavfsirayotgani haqida yozgandi. Amerika tomoni uni yetkazib berishni paysalga solishining yana bir sababi — Ukraina harbiylarini Grey Eagle’ni boshqarishga o‘rgatish zarurati bo‘ldi. Reuters ma’lumotlariga ko‘ra, gap Kiyevga to‘rtta Grey Eagle dronlarining taqdim etilishi haqida bormoqda. AQSH bungacha Ukrainaga Switchblade va Phoenix Ghost kamikadze dronlarini yetkazib bergan.
Izoh (0)