АҚШ Давлат департаменти Литвага HIMARS ёппасига ўт очувчи реактив тизимлари ва улар учун зарур жиҳозларни сотишга рухсат берди. Вильнюс саккизта HIMARS тизими ва уларга ўқ-дори сўраган. Келишув қиймати 495 миллион долларга баҳоланмоқда.
«Бу келишув НАТО иттифоқчисининг мудофаа қобилиятини мустаҳкамлашга ёрдам бериши билан АҚШ ташқи сиёсати ва миллий хавфсизлик мақсадларига мос келади», — АҚШ Мудофаа вазирлигининг хавфсизлик бўйича ҳамкорлик агентлиги баёнотида. Пентагоннинг фикрича, HIMARS’нинг Литвага сотилиши минтақадаги асосий ҳарбий мувозанатни ўзгартирмайди.
АҚШ маъмурияти ўз қарори ҳақида Конгрессни хабардор қилган. У 30 кун ичида битимни кўриб чиқади.
Россиянинг Украинада ҳарбий амалиёти бошланганидан кейин НАТО шарқий чегараларда ўз иштирокини кучайтирмоқда. Ёзда Шимолий Атлантика альянси Шарқий Европадаги тезкор ҳаракат кучлари сонини 40 мингдан 300 минг нафаргача оширишга қарор қилди.
Июнь ойидан бери АҚШ Украинага HIMARS қурилмаларини етказиб бермоқда. Украина Қуролли кучлари ушбу реактив тизим Россия ҳарбий обектларига, жумладан, ҳаво ҳужумидан мудофаа тизимлари ва ўқ-дорилар омборларига ўнлаб зарбалар йўллаш имконини берувчи қимматли воситага айланганини таъкидламоқда. Россия Қуролли кучлари Украинадаги бир нечта HIMARS қурилмасини йўқ қилишга муваффақ бўлганини маълум қилган, аммо буни на Украина, на Америка томони тасдиқлади.
Изоҳ (0)