“Rossiya joriy vaziyatni hisobga olgan holda Ukraina bilan muzokaralarga tayyor” — Mariya Zaxarova

Rossiya TIV matbuot kotibi Mariya Zaxarova Rossiya tomoni Ukraina bilan muzokaralar uchun hamon ochiqligi va muloqotni hozirda yuzaga kelayotgan voqelikni hisobga olgan holda tashkil etishga tayyor ekanligini bildirdi, deb yozadi “RIA Novosti”.

“Rossiyaning muzokaralarga tayyorligi hamon o‘z kuchida ekanligini ta’kidlayman”, — dedi u Moskvadagi brifingda nemis vakilining Rossiya tomonining Kiyev rejimi bilan muzokaralarga “tayyor emasligi” haqidagi so‘nggi bayonotini izohlar ekan.

Undan tashqari, Zaxarova “Germaniya tomoni Kiyev rejimini turli xil qurol tizimlari bilan kuchaytirishda davom etayotganini” eslatdi.

“Shuni qayta ta’kidlamoqchimanki, biz hali ham muzokaralarga ochiqmiz, biz muloqotni hech qachon rad etmaganmiz va unga tayyormiz, albatta, hozirgi paytda shakllanayotgan voqelikni hisobga olgan holda”, — deydi Zaxarova.

Avvalroq Rossiya Ukraina bilan muzokaralarni qayta boshlash uchun shart qo‘ymayotgani haqida xabar berilgan edi. Bunga javoban esa Ukraina prezident ofisi vakili Mixail Podolyak qarshi tomonni “so‘z o‘yinini to‘xtatishga” chaqirdi. Uning fikricha, muzokaralar — Kremlning ultimatumlarini tan olishdir.