Qozog‘istonning Mang‘istau viloyatidagi Baliq nazorati boshqarmasi xodimlari Kaspiy dengizi qirg‘og‘ida 130 dan ortiq o‘lik tyulenlarni topdi. Bu haqda Qozog‘iston Ekologiya, geologiya va tabiiy resurslar vazirligining Baliqchilik xo‘jaligi qo‘mitasi matbuot xizmati xabar berdi.
Tyulenlarning o‘limi sabablarini aniqlash uchun voqea joyida hukumat vakillari, ekologlar, Gidrobiologiya va ekologiya instituti, shuningdek, Kaspiy dengizi tyulenlarini o‘rganish va reabilitatsiya markazi xodimlaridan iborat komissiya ish olib bormoqda.
“Ayni damda ilmiy muassasalar va tashkilotlarning, shuningdek veterinariya xizmatlarining xodimlari hayvonlar nobud bo‘lgan joyda gidrobiologik, gidrokimyoviy tahlillar uchun suv va tuproqdan tegishli namunalar olmoqda. Shuningdek, gistologik va toksikologik laboratoriya tadqiqotlari uchun tyulenlarning to‘qimalari va ichki organlaridan ham namuna olinmoqda”, — deb tushuntirdi matbuot xizmati.
Qozog‘iston prezidenti Qosim-Jo‘mart To‘qayev Mang‘istau viloyatiga tashrifi chog‘ida Kaspiy dengizini o‘rganish bo‘yicha davlat ilmiy institutini tashkil etish tarafdori ekanligini ma’lum qilgan. Shuningdek, tegishli idoralarga Kaspiy dengizi tyulenlari populyatsiyasini saqlab qolish bo‘yicha ishlarni tezlashtirish, Kaspiy dengizi akvatoriyasi va qirg‘oqlarini muntazam o‘rganishni tashkil etish bo‘yicha topshiriqlar bergan.
Izoh (0)