Kreml va Rossiya Mudofaa vazirligi deputatlarning armiyada xizmat muddatini 2 yilga oshirish haqidagi taklifini qo‘llab-quvvatlamadi

Rossiya deputatlari va senatorlarining armiyada xizmat muddatini ikki yilgacha oshirish tashabbusi prezident ma’muriyati va Rossiya Mudofaa vazirligi tomonidan qo‘llab-quvvatlanmadi. Bu haqda “Vedomosti” nashriga Federatsiya Kengashidagi ikki manba va mudofaa vazirligiga yaqin suhbatdosh ma’lum qildi.

Hukumat harbiy xizmatchilarni “miqdor jihatdan emas, balki sifat tomondan” tayyorlashga e’tibor qaratishga qaror qilgan. “Xizmat muddatining oshirilishi bunga hissa qo‘sha olmaydi”, — dedi Rossiya Mudofaa vazirligiga yaqin manba.

O‘z navbatida, Federatsiya Kengashidagi manbaning aytishicha, Kreml bu masala bo‘yicha qaror qabul qilishda tashabbusga qarshi chiqqan parlament a’zolari pozitsiyasini ham hisobga olgan.

Anneksiya qilingan Qrimdan Davlat Dumasi deputati Mixail Sheremet noyabr oyi boshida armiyadagi muddatli harbiy xizmatni bir yildan ikki yilgacha oshirishni taklif qilgandi. Uning ta’kidlashicha, bunday chora rossiyalik harbiy xizmatchilarni yanada yaxshi tayyorlashga va Rossiya armiyasining jangovar tayyorgarligini oshirishga yordam beradi. O‘z navbatida, Federatsiya Kengashining konstitutsiyaviy qonunchilik qo‘mitasi rahbari Andrey Klishas bunga shubha bildirgan.

Rossiya prezidentining matbuot kotibi Dmitriy Peskov Rossiya prezidenti ma’muriyati armiyadagi xizmat muddatini oshirish masalasini muhokama qilmayotganini aytgan. Uning ta’kidlashicha, bu masalada “hamma narsa Mudofaa vazirligining pozitsiyasiga bog‘liq”.