Россия депутатлари ва сенаторларининг армияда хизмат муддатини икки йилгача ошириш ташаббуси президент маъмурияти ва Россия Мудофаа вазирлиги томонидан қўллаб-қувватланмади. Бу ҳақда «Ведомости» нашрига Федерация Кенгашидаги икки манба ва мудофаа вазирлигига яқин суҳбатдош маълум қилди.
Ҳукумат ҳарбий хизматчиларни «миқдор жиҳатдан эмас, балки сифат томондан» тайёрлашга эътибор қаратишга қарор қилган. «Хизмат муддатининг оширилиши бунга ҳисса қўша олмайди», — деди Россия Мудофаа вазирлигига яқин манба.
Ўз навбатида, Федерация Кенгашидаги манбанинг айтишича, Кремль бу масала бўйича қарор қабул қилишда ташаббусга қарши чиққан парламент аъзолари позициясини ҳам ҳисобга олган.
Аннексия қилинган Қримдан Давлат Думаси депутати Михаил Шеремет ноябрь ойи бошида армиядаги муддатли ҳарбий хизматни бир йилдан икки йилгача оширишни таклиф қилганди. Унинг таъкидлашича, бундай чора россиялик ҳарбий хизматчиларни янада яхши тайёрлашга ва Россия армиясининг жанговар тайёргарлигини оширишга ёрдам беради. Ўз навбатида, Федерация Кенгашининг конституциявий қонунчилик қўмитаси раҳбари Андрей Клишас бунга шубҳа билдирган.
Россия президентининг матбуот котиби Дмитрий Песков Россия президенти маъмурияти армиядаги хизмат муддатини ошириш масаласини муҳокама қилмаётганини айтган. Унинг таъкидлашича, бу масалада «ҳамма нарса Мудофаа вазирлигининг позициясига боғлиқ».
Изоҳ (0)