“Daryo” nashri 8-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Kiyev Rossiya bilan muzokaralardan bosh tortmagan. Zelenskiy Rossiya bilan muzokaralarni boshlash uchun o‘z shartlarini ma’lum qildi
Ukraina prezident ofisi rahbari maslahatchisi Mixail Podolyak Kiyev hech qachon Rossiya bilan muzokaralardan bosh tortmaganini ta’kidladi, deb yozadi “RBK”. Uning so‘zlariga ko‘ra, Ukrainaning pozitsiyasi ma’lum va ravshan: avval Rossiya Ukraina hududidan o‘z qo‘shinlarini olib chiqadi, “keyin hammasi amalga oshadi”. “Putin tayyormi? Shubhasiz. Biz esa konstruktiv baho beramiz: faqatgina Rossiya Federatsiyasining navbatdagi rahbari bilan muloqot qilamiz”, — deb yozgan Podolyak.
Shundan so‘ng Ukraina prezidenti Vladimir Zelenskiy G‘arb nashrlarining Kiyev Rossiya bilan muzokaralar o‘tkazishga da’vat etilayotgani haqidagi xabarlaridan keyin muloqot boshlash uchun Ukrainaning shartlarini ma’lum qildi. Bu haqda u 7-noyabr kuni kechki murojaatida aytib o‘tdi.
Ushbu shartlar quyidagilardan iborat:
- Rossiyaga qo‘shib olingan hududlar qaytarilgan holda Ukraina hududiy yaxlitligining qayta tiklanishi;
- BMTga hurmat;
- barcha zararlarning qoplanishi;
- har bitta harbiy jinoyatchining jazolanishi;
- bu boshqa hech qachon takrorlanmasligining kafolatlanishi.
Ayni vaziyatda Zelenskiy ma’muriyati Qrimni qaytarib olish bo‘yicha reja tayyorlamoqda, Rossiya qo‘shinlari esa Mariupol atrofida mudofaa istehkomlarini qurishni boshlagan
AQSH prezidenti ma'muriyati Shimoliy Koreyaga nisbatan sanksiyalarni kuchaytiradi. Qaror Yaponiya va Janubiy Koreya bilan birgalikda qabul qilinishi kutilmoqda
AQSH hukumati Shimoliy Koreyaning yadroviy sinovlariga javoban Yapon dengiziga aviatashuvchi kema yuborishni rejalashtirmoqda. Bu haqda Kyodo News+ xabar berdi.
“Qaror Yaponiya va Janubiy Koreya bilan birgalikda qabul qilinishi kutilmoqda. AQSH prezidenti Jo Bayden ma’muriyati Shimoliy Koreyaga nisbatan sanksiyalarni kuchaytirish bo‘yicha BMT Xavfsizlik kengashi rezolyutsiyasi loyihasini ham tayyorlamoqda”, — deyiladi bayonotda.Bundan tashqari, raketa sinovlariga javoban Vashington, Seul va Tokio Pxenyanga qo‘shimcha sanksiyalar joriy etish niyatida, bu esa neft mahsulotlari eksportiga va “Shimoliy Koreya rasmiylari bilan aloqador xakerlar” ishiga ta’sir qiladi.
AQSH va uning Osiyodagi eng yaqin ikki ittifoqchisi bilan aloqalarni qo‘llab-quvvatlash uchun Amerikaning Hind-Tinch okeani qo‘mondonligi rahbari admiral Jon Akilino Yapon dengizidagi safari davomida yadroviy samolyot tashuvchi kemada Yaponiyaning o‘zini-o‘zi mudofaa qilish kuchlari va Janubiy Koreya harbiylarining yuqori martabali zobitlariga qo‘shilishi mumkin.AQSH hukumati Shimoliy Koreyani keyingi provokatsiyalardan tiyilishga va Koreya yarim orolini to‘liq yadrosizlantirish yo‘lida “barqaror va mazmunli muloqot” olib borishga chaqirdi.
Ukraina va Rossiya prezidentlari taklif qilingan G 20 sammitida, Putin va Zelenskiy uchrashadimi?
Ukraina prezidenti Vladimir Zelenskiy 15—16-noyabr kunlari Indoneziyaning Bali orolida bo‘lib o‘tadigan G20 sammitida ishtirok etishni rejalashtirmoqda. Prezident matbuot kotibi Sergey Nikiforov sammitda Zelenskiy katta ehtimol bilan onlayn tarzda ishtirok etishini aytdi. 3-noyabr kuni Zelenskiy agar G20 sammitida Rossiya prezidenti Vladimir Putin ishtirok etsa, unda qatnashishdan bosh tortishini ma’lum qilgandi.
“Vedomosti” gazetasi esa manbalarga tayanib, Putin Baliga bormoqchi emasligini, uning o‘rniga tashqi ishlar vaziri Sergey Lavrov qatnashishi haqida xabar bergandi. Rossiya prezidenti matbuot kotibi Dmitriy Peskovning aytishicha, Kreml prezident Vladimir Putinning G20 sammitida ishtirok etish-etmasligini shu hafta e’lon qiladi.
8-noyabr kuni Indoneziya prezidenti Joko Vidodo Putin Balidagi G20 sammitiga bormasligini ma’lum qildi.Zelenskiy ham, Putin ham G20 sammitiga taklif qilingan. Oktabr oyida Indoneziya rasmiylari har ikki prezident sammitda ishtirok etishga rozilik bildirganini aytgandi, biroq ular “Ukraina va Rossiya o‘rtasidagi urush tufayli bu oson bo‘lmasligini” ta’kidlagan.
Bank va kredit masalalarida jinoyatlar soni ko‘paygan. O‘zbekistonning qaysi viloyatida bu masala eng dolzarb bo‘lmoqda?
Namanganda joriy yilning 9 oyi davomida sudlar tomonidan banklar bilan bog‘liq jami 162 ta jinoyat ishi ko‘rilgan. Bu haqda “Daryo” muxbiri Azizbek Abduvaliyev xabar bermoqda.
Mazkur ishlardan 157 tasini kreditga oid jinoyatlar tashkil etgan. “Ko‘rib chiqayotgan har 10 ta ishimizdan to‘rttasi bank va kredit masalalariga borib taqalyapti. Bu juda xavotirli raqamlar. Bunday holatlarning oldini olish uchun sudyalarimiz banklarga chiqib, xodimlar, xususan, kredit bilan bog‘liq amaliyotlarda ishtirok etuvchi mutaxassislar bilan muloqotda bo‘lmoqda. Ularga bank sohasi bilan bog‘liq jinoyat ishlari bo‘yicha ayblov hukmi chiqarilgan holatlar yuzasidan batafsil tushunchalar berilyapti”, — deydi Namangan viloyat sudi jinoyat ishlari bo‘yicha sudlov hay’ati raisi Adhamjon Mirzayev.
Qayd etilishicha, bank sohasida sodir etilgan jinoyatlar oqibatida 101,2 milliard so‘m miqdoridagi zarar yetkazilgan. Bundan 94,3 milliard so‘mi bevosita kredit faoliyati bilan bog‘liq. Tergov va sud davrida qariyb 50 milliard so‘m mablag‘ qoplangan va qolgani sud qarori bilan undirilishi ko‘rsatilgan.
Shuningdek, viloyatda bank xodimlari o‘rtasida firibgarlik va korrupsiya holatlari ham ko‘plab kuzatilmoqda: 2022-yilning 9 oy davomida 43 nafar bank xodimi tomonidan korrupsion jinoyatlar sodir etilgani aniqlangan.
Izoh (0)