Rossiya tashqi ishlar vaziri o‘rinbosari Andrey Rudenko Kreml Ukraina bilan muzokaralarni qayta boshlash uchun shart qo‘ymasligini ta’kidladi, deb xabar qiladi “Interfaks”.
“Ukraina Rossiya bilan tinchlik muzokaralarini olib borishni taqiqlovchi qonunni qabul qildi. Bu ularning tanlovi, muzokaralarning uzilib qolishida bizning aybimiz yo‘q, biz har doim bu kabi muzokaralarga tayyorligimizni bildirganmiz”, — dedi Rudenko jurnalistlarga.
“Bizning tomondan oldindan hech qanday ortiqcha shartlar yo‘q: Ukrainaning bunga xayrixohligi kifoya”, — deya qo‘shimcha qildi u.
Oktabr oyi oxirida Rossiya prezidenti Vladimir Putin Rossiyaning Ukraina bilan muzokaralar bo‘yicha pozitsiyasi o‘zgarmasligini, biroq Kiyev muzokaralar jarayoniga intilmayotganini aytgan edi.
Izoh (0)