Medvedev Ukrainadagi maxsus operatsiya sabablaridan birini ma’lum qildi

Kiyevning yadro dasturini qayta boshlash haqidagi tahdidlari Rossiya harbiy operatsiyasi boshlanishi uchun sabablardan biri bo‘lgan, deb yozdi Rossiya Xavfsizlik kengashi raisi o‘rinbosari Dmitriy Medvedev “VKontakte”da.

Uning so‘zlariga ko‘ra, “noto‘liq mamlakatning notavon qo‘g‘irchoqlari” 1994-yilda AQSH, Buyuk Britaniya, Rossiya va Ukraina tomonidan imzolangan Budapesht memorandumi doirasida xavfsizlik kafolatlari evaziga yadro qurolidan voz kechgani uchun endi “achchiq ko‘z yoshi to‘kmoqda”. Ushbu hujjatga muvofiq, Ukraina o‘z hududida joylashgan, ham o‘zining, ham SSSR davridan qolgan yadro qurollarini olib chiqish majburiyatini olgan.

“Yana, Ukraina yetakchilari ularni bizga va o‘z fuqarolariga qarshi iblisona mamnuniyat bilan qo‘llagan bo‘lishini aytgandi. Yadro dasturini qaytadan boshlash haqida tahdid qilib, bunga aniq ishora qildi, va bu maxsus harbiy operatsiya o‘tkazish uchun ahamiyatli sabablardan biriga aylandi”, — dedi Medvedev.

Xavfsizlik kengashi raisi o‘rinbosari ta’kidlashicha, Ukrainaning barcha prezidentlari, Kravchukdan tortib, Zelenskiygacha, bu majburiy qadam bo‘lganini aytib kelgan. Biroq aslida bunday kuchli qurolni saqlab turish uchun shunchaki Ukrainaning puli yetmagan bo‘lardi.

Rossiya prezidenti Vladimir Putin 24-fevral kuni Ukrainada harbiy operatsiya boshlanishi haqida e’lon qilayotib, Rossiya “zamonaviy Ukraina hududidan kelayotgan doimiy tahdidlar fonida o‘zini xavfsiz his qilishi, rivojlanishi mumkin emasligini” aytgandi, “Rossiyaning bu kuchlar bilan to‘qnashishi muqarrar” degan edi u. O‘shanda Putin jangovar harakatlar maqsadi sifatida “ sakkiz yil mobaynida Kiyev rejimi tomonidan xo‘rlanib, genotsidga duchor bo‘layotgan odamlarni himoya qilish” hamda qo‘shni mamlakatni “demilitarizatsiya va denatsifikatsiya qilish”ga intilish ekanini aytgandi.

Ukraina prezidenti Vladimir Zelenskiy 2022-yil 19-fevral kuni Myunxen xavfsizlik konferensiyasida Ukraina 1994-yilda xavfsizlik kafolatlari evaziga yadro qurolidan voz kechganini eslatgandi. U, agar Kiyev amaliy kafolatlarni qo‘lga kiritmasa, Budapesht memorandumidagi ishtirokini qayta ko‘rib chiqish bilan tahdid qilgandi.