Jurnalist Kseniya Sobchak Rossiyaga qaytib keldi, deb yozadi “RIA Novosti” guvohlarga tayanib, ular Sobchak Pskov viloyatida chegarani kesib o‘tganini ko‘rgan.
Guvohlar agentlikka ma’lum qilishicha, Sobchak turmush o‘rtog‘i Konstantin Bogomolov bilan birga Latviya bilan chegarada joylashgan “Burachki” o‘tkazish punkti orqali Rossiyaga kirgan. Bu haqda Mash Telegram-kanali ham yozmoqda.
Shuningdek, Kseniya Sobchakning Rossiyaga qaytgani haqida uning tanishlaridan biri “RBK”ga ma’lum qilgan, jurnalistning oilasiga yaqin manbalar esa “TASS”ga xabar bergan.
Sobchakning o‘zi buni izohlaganicha yo‘q. O‘tgan hafta uning onasi, Federatsiya kengashi a’zosi Lyudmila Narusova qizi “juda yaqin vaqtda” Rossiyaga qaytib kelishini aytgandi. Hozir u izoh berishdan bosh tortgan.
Sobchak Rossiyadan 26-oktabr kuni ketgandi. O‘sha kuni uning Moskva viloyatidagi uyi uning tijorat direktori Kirill Suxanovga nisbatan ochilgan ta’magirlik haqidagi ish bo‘yicha tintuv qilingandi. Sobchak Isroil fuqarosi sifatida Belarus orqali Litva hududiga o‘tgan.
“TASS” davlat agentligi o‘z manbalariga tayanib, politsiyaga tergovchining Sobchakni qo‘lga olish to‘g‘risidagi qarori kelib tushgani, biroq u “yashirinishga muvaffaq bo‘lgani” haqida ma’lum qilgandi. Keyinroq, agentlik yozishicha, IIV tergovchisi Sobchakni gumonlanuvchi sifatida jalb qilish haqidagi qarorni bekor qilgan. Sobchakning advokati Sergey Badamshin esa unda “ish bo‘yicha gumonlanuvchi yoki ayblanuvchi maqomi yo‘q va bo‘lmagani”ni aytgandi.
Sobchak “Ostorojno, Media” (“Ehtiyot bo‘ling, matbuot”) loyihasini boshqaradi, u yangiliklar Telegram-kanallari va pabliklarini, podkastlar studiyasini, shuningdek, Sobchakning ijtimoiy tarmoqlarini o‘z ichiga oladi.
Sobchak — teleboshlovchi va siyosatchi, 2018-yilda u Rossiya prezidenti saylovida qatnashib, 1,68 foiz ovoz bilan to‘rtinchi o‘rinni egallagan. 2019-yildan buyon “Ehtiyot bo‘ling, Sobchak!” YouTube kanalini yuritib, yangiliklar sharhlari va taniqli shaxslar bilan intervyularni joylab boradi.
Izoh (0)