Qoraqalpog‘iston Respublikasidagi barcha maktablarning boshlang‘ich sinf o‘quvchilari 11-noyabrdan bepul tayyor oziq-ovqatlar bilan ta’minlanadi. Bu haqda Qoraqalpog‘iston xalq ta’limi vazirligi matbuot xizmati xabar berdi.
Ma’lum qilinishicha, 2022/2023-o‘quv yilida Qoraqalpog‘istondagi 716 ta ta’lim muassasalarida 143 577 nafar boshlang‘ich sinf o‘quvchilari keytering tashkilotlari tomonidan bepul oziq-ovqat bilan ta’minlanishi belgilangan. Ushbu maktablar hududlar kesimida 64 ta lotlarga joylashtirildi.
Platformaga joylashtirilgan 64 ta lotlardan 41 ta lot 11 ta tadbirkorlik subyektlari tomonidan yutib olinib shartnomalar rasmiylashtirildi, hozirda 716 ta umumta’lim maktablaridan 481 ta maktabda boshlang‘ich sinf o‘quvchilari bepul ovqat bilan ta’minlanmoqda.
22 ta lotda baholash ishlari tugatilib, bayonnomalar rasmiylashtirilib, 24-oktabrdan boshlab nonushta tarqatilishi rejalashtirilgan edi. Lekin Korrupsiyaga qarshi kurashish agentligining taqdimnomasiga asosan “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi”gi nizomning buzilishi bo‘yicha o‘tkazilgan 22 ta lotlar tanlovi ishchi guruh komissiyasi tomonidan bekor qilindi va bundan tashqari, tadbirkorlik subyekti tomonidan 1 ta lot bekor qilinib, jami 23 ta lot tanlov (tender)ga qayta joylashtirildi.
“Joriy yil 11-noyabr kuni o‘qish boshlanishi bilan barcha maktablarning boshlang‘ich sinf o‘quvchilarini bepul tayyor oziq-ovqatlar bilan ta’minlash rejalashtirilgan”, — deyiladi Qoraqalpog‘iston XTV xabarida.
Shavkat Mirziyoyevning maxsus topshirig‘iga asosan 1-noyabr kuni Prezident administratsiyasi rahbari Sardor Umrzoqov raisligida o‘tgan videoselektor yig‘ilishida Qoraqalpog‘istonda tender tanlovlarini o‘tkazish davom etayotganligi bois boshlang‘ich sinf o‘quvchilari uchun bepul tushlik berish hali to‘liq yo‘lga qo‘yilmagani tanqid qilingandi.
Izoh (0)