Hindistonda tug‘ilgan shaxs O‘zbekiston qonunchiligi bo‘yicha jinoiy javobgarlikka tortildi, deb xabar bermoqda IIV Kiberxavfsizlik markazi.
Qayd etilishicha, Qashqadaryo viloyatida joylashgan Indorama agro MCHJ vakillari viloyat IIBga murojaat qilgan. Unda Telegram messenjeridagi guruhda Rahul nomli foydalanuvchi ishchi xodimlarni ingliz tilida haqorat qilgani, bu bir qancha ishchilarning e’tirozlariga sabab bo‘lgani bildirilib, unga nisbatan qonuniy chora ko‘rish so‘ralgan.
Tezkor-qidiruv tadbirlari natijasida Telegram’da haqoratli so‘zlarni ishlatgan shaxs Hindistonda tug‘ilgan, hozirda Indorama agro MCHJda ishlovchi K.R. ekani aniqlangan.
Unga nisbatan Jinoyat kodeksining 140-moddasi (haqorat qilish) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)