2022 йилнинг ўтган 9 ойи мобайнида Ўзбекистонда 2,6 миллион тоннадан зиёд картошка етиштирилди. Бу ўтган йилнинг шу даврига нисбатан 6,6 фоизга кўп кўрсаткичдир, дея хабар бермоқда EastFruit.
Ўзбекистон Давлат статистика қўмитасининг дастлабки маълумотларига кўра, 2022 йилнинг январь ойи бошидан сентябрь ойи охирига қадар Ўзбекистонда картошка етиштириш ҳажми 2649 минг тоннани ташкил этган. Бу 2021 йилнинг шу даврига нисбатан 164 минг тоннага ёки 6,6 фоизга кўпдир.
2021 йилнинг мос даврига нисбатан картошка етиштириш бўйича фермер хўжаликларида 31,4 фоиз (376,7 минг тоннадан 495 минг тоннага), деҳқон (шахсий ёрдамчи) хўжаликларида 0,6 фоиз (2091,6 минг тоннадан 2104,1 минг тоннага) ва қишлоқ хўжалиги корхоналарида 3 баробар (16,7 дан 49,9 минг тоннагача) ўсиш кузатилган.
Шунга кўра, 2021 йилнинг мос даврига нисбатан картошка етиштиришнинг умумий ҳажмида қишлоқ хўжалиги корхоналари улуши 0,7 фоиздан 1,9 фоизга, фермер хўжаликлари улуши 15,1 фоиздан 18,7 фоизга кўпайди, лекин деҳқон (шахсий ёрдамчи хўжаликлар) хўжаликлари улуши 84,2 фоиздан 79,4 фоизга камайди.
Картошка етиштиришнинг 80 фоиздан ортиғи мамлакатнинг етти вилоятига тўғри келади:
- Самарқанд — 20,5 фоиз;
- Тошкент — 11,4 фоиз;
- Сурхондарё — 11,3 фоиз;
- Наманган — 9,7 фоиз;
- Фарғона — 9,6 фоиз;
- Андижон — 9,2 фоиз;
- Бухоро — 8,8 фоиз.
Бу борада Ўзбекистоннинг қолган олти вилоятининг умумий улуши 19,5 фоизни ташкил этди.
2022 йилнинг 28 октябрь ҳолатига кўра, Ўзбекистонда картошканинг ўртача улгуржи нархи 2021 йилнинг шу санасига нисбатан 20 фоизга арзон.
Изоҳ (0)