Rossiyaning Kiyev bilan muzokaralar bo‘yicha pozitsiyasi ikkilanishlar va o‘zgarishlarga uchramaydi, Moskva muloqot davom ettirilishini kutmoqda, dedi mamlakat prezidenti Vladimir Putin.
“Agar u tomonning hattoki biz bilan gaplashishga xohishi ham bo‘lmasa, kelishuvlarni qanday muhokama qilish mumkin? Kutaylik-chi, balki qandaydir zarur shartlar tug‘ilar, bizning samimiy niyatlarimiz ma’lum — ular o‘zgarmaydi va shubha-gumonlar ostiga tushmaydi”, — dedi Rossiya rahbari.
Shuningdek, u o‘z pozitsiyasini oldindan bildirib qo‘yish doim ham foyda keltirmasligini aytdi, biroq natijalarga erishish uchun “muzokaralar stoliga o‘tirib, kelishib olish” kerak.
30-sentabr kuni Kremlda Donetsk va Lugansk xalq respublikalari hamda Ukrainaning Xerson va Zaporojye viloyatlari bosib olingan qismlarining “Rossiya tarkibiga kirishi” haqida shartnomalar imzolandi. O‘sha kuniyoq Ukraina hukumati NATOga qo‘shilish uchun ariza berdi. Zelenskiy o‘shanda Rossiya bilan muloqotga tayyorligini aytgan, lekin “boshqa prezident bilan” degan edi.
4-oktabr kuni esa Ukraina rasman Putin bilan har qanday muzokaralardan bosh tortdi.
30-oktabr kuni tashqi ishlar vaziri Sergey Lavrov Rossiya va prezident Vladimir Putin Ukrainadagi vaziyat bo‘yicha muzokaralarga tayyorligini yana bir marta tasdiqladi. O‘sha kuniyoq prezident matbuot kotibi Dmitriy Peskov Kiyev bilan muzokaralar va Zelenskiy bilan kelishuvlar “hech narsaga arzimasligini”, chunki “tashqaridan berilgan buyruq orqali” bir lahzada bekor qilinishi mumkinligini aytdi. “Shuni aniq-ravshanki, hal qiluvchi ovoz — Vashingtonniki”, — dedi u.
Mavzuga doir:
Izoh (0)