Россиянинг Киев билан музокаралар бўйича позицияси иккиланишлар ва ўзгаришларга учрамайди, Москва мулоқот давом эттирилишини кутмоқда, деди мамлакат президенти Владимир Путин.
«Агар у томоннинг ҳаттоки биз билан гаплашишга хоҳиши ҳам бўлмаса, келишувларни қандай муҳокама қилиш мумкин? Кутайлик-чи, балки қандайдир зарур шартлар туғилар, бизнинг самимий ниятларимиз маълум — улар ўзгармайди ва шубҳа-гумонлар остига тушмайди», — деди Россия раҳбари.
Шунингдек, у ўз позициясини олдиндан билдириб қўйиш доим ҳам фойда келтирмаслигини айтди, бироқ натижаларга эришиш учун «музокаралар столига ўтириб, келишиб олиш» керак.
30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.
4 октябрь куни эса Украина расман Путин билан ҳар қандай музокаралардан бош тортди.
30 октябрь куни ташқи ишлар вазири Сергей Лавров Россия ва президент Владимир Путин Украинадаги вазият бўйича музокараларга тайёрлигини яна бир марта тасдиқлади. Ўша куниёқ президент матбуот котиби Дмитрий Песков Киев билан музокаралар ва Зеленский билан келишувлар «ҳеч нарсага арзимаслигини», чунки «ташқаридан берилган буйруқ орқали» бир лаҳзада бекор қилиниши мумкинлигини айтди. «Шуни аниқ-равшанки, ҳал қилувчи овоз — Вашингтонники», — деди у.
Изоҳ (0)