Rossiya safarbar qilinganlarni eski avtomatlar bilan frontga yubormoqda — Buyuk Britaniya Mudofaa vazirligi

Britaniya Mudofaa vazirligi Ukrainadagi urushning borishiga oid kunlik tahlilida Rossiyadagi safarbarlik doirasida xizmatga chaqirilganlar eski qurollar bilan frontga jo‘natilayotganini xabar qildi.

Ochiq manbalardan olingan tasvirlarga ko‘ra, safarbar qilinganlarga AKMS  avtomatlari tarqatilgan. Bu 1960-yillarning boshlarida SSSR tomonidan ishlatilgan AKM (modernizatsiyalangan Kalashnikov avtomati) versiyasi. Buyuk Britaniya Mudofaa vazirligi ma’lumotlariga ko‘ra, bunday avtomatlarning zaxiralari omborlarda saqlanib turgan va ularning aksariyati yomon sharoit tufayli yaroqsiz holga kelgan bo‘lishi mumkin.

AKMS 1943-yil namunasidagi 7,62x39 millimetrli patronlarni otadi, Britaniya harbiylarining qayd etishicha, Rossiya armiyasining oddiy qismlari asosan 5,45x39 mm patronlardan foydalangan holda AK-74M yoki AK-12 avtomatlari bilan qurollangan. Buyuk Britaniya Mudofaa vazirligining fikriga ko‘ra, front chizig‘ini turli xil o‘q-dorilar bilan ta’minlash zarurati Rossiya armiyasining logistika zanjirlariga yanada katta yuk bo‘ladi, ular hozirgi bosimga zo‘rg‘a bardosh bermoqda.