Rossiya prezidenti Vladimir Putin Rossiyada safarbarlik yakunlanganini ma’lum qildi. Bunday bayonotni u Sochida, Armaniston va Ozarbayjon rahbarlari bilan muzokaralardan keyin tashkil qilingan matbuot anjumanida berdi, deb yozadi Meduza.
Shu bilan birga, Putin tegishli farmonni hali imzolamaganini ta’kidladi va o‘zi bunday farmon kerakmi, yo‘qmi — shuni bilmasligini aytdi.
“Ha, bu (safarbarlikning e’lon qilinishi) mening farmonim bilan amalga oshirilgandi… lekin Mudofaa vazirligi taklifi bilan qilingan, endi esa Mudofaa vazirligi safarbarlik tadbirlarini yakunlashni taklif etdi. Men hatto, ochig‘ini aytganda, bu haqda o‘ylamagan edim. Huquqshunoslar bilan gaplashib ko‘ray, safarbarlik yakunlangani haqida farmon chiqarib, keyin e’lon qilish kerakmikan. Lekin u yakunlangan, nuqta qo‘yilgan”, — dedi Rossiya prezidenti.
Shuningdek, Putin ma’lum qilishicha, hozirda qurolli kuchlarning jangovar saflarida bor-yo‘g‘i 41 ming nafar safarbar etilganlar bor, 259 ming kishi esa “jangovar harakatlarda umuman qatnashgani yo‘q, ular tayyorgarlikdan o‘tmoqda”. Ayni paytda u mudofaa vaziri Sergey Shoyguning ma’ruzasiga tayandi. Shoyguning o‘zi qo‘shinlarga 82 ming kishi yuborilganini aytgandi.
31-oktabr kuni Rossiya Mudofaa vazirligi chaqiruv qog‘ozlari yuborishni to‘xtatishini e’lon qilgandi. Shoygu Putinga safarbarlik tadbirlari tugagani haqida 28-oktabr kuni hisobot bergan.
Shoyguning bayonotlariga qaramay, Rossiyaning turli hududlaridan odamlarga chaqiruv qog‘ozlari kelishda davom etayotgani haqida xabarlar kelib tushgan. Putinning matbuot kotibi Dmitriy Peskov buni harbiy komissariatlarning “muayyan inersiyasi” bilan izohlagan edi.
Eslatib o‘tamiz, Rossiyada qisman safarbarlik 21-sentabr kuni e’lon qilindi va 300 ming kishi armiyaga chaqilishi ma’lum qilindi. 14-oktabr kuni allaqachon 222 ming kishi safarbar etilgani haqida xabar berildi.
Mavzuga doir:
Izoh (0)