“Qorabog‘ mojarosiga qachondir chek qo‘yish kerak” — Vladimir Putin

Qorabog‘ mojarosiga qachondir chek qo‘yish kerak, dedi Rossiya prezidenti Vladimir Putin Armaniston bosh vaziri Nikol Pashinyan bilan uchrashuvda.

“Biz hamkasblarimizning Armaniston—Ozarbayjon chegarasi va Qorabog‘ atrofida sodir bo‘layotgan voqealarga yondashuvlarini ko‘rdik. Bu mojaro o‘n yildan beri davom etmoqda, shu sabab qachondir bularning hammasiga barham berish kerak, shundaymi? Bilaman, buning uchun sizda siyosiy xohish bor va biz buni har tomonlama qo‘llab-quvvatlaymiz”, — dedi Rossiya rahbari Armaniston bosh vaziriga.

Putinning so‘zlariga ko‘ra, eng muhimi — Qorabog‘da tinchlik va barqarorlikni ta’minlash, transport infratuzilmasini blokdan chiqarish.

31-oktabr kuni Rossiya—Armaniston—Ozarbayjon uch tomonlama sammiti ham rejalashtirilgan bo‘lib, unda davlatlar rahbarlari Qorabog‘dagi vaziyatni tartibga solishni muhokama qiladi. Sammitda tomonlar bo‘lajak tinchlik shartnomasining asosini tashkil etuvchi hujjatni qabul qilishi mumkin.

Tomonlar Qorabog‘da Rossiya tinchlikparvar kuchlarining qolishini 10—20 yilga uzaytirish masalasiga ham to‘xtalishi mumkin. Rossiya yetakchisining matbuot kotibi Dmitriy Peskov ushbu hujjatni imzolash istiqboli haqida gapirar ekan, oldindan bir narsa demaslikni va muzokaralar natijasini kutishni taklif qildi.