Chexiya bosh vaziri Pyotr Fiala boshchiligidagi hukumat delegatsiyasi Kiyevga keldi, deb xabar bermoqda Ceska Televize.
Fialadan tashqari delegatsiya tarkibida Chexiya tashqi ishlar vaziri Yan Lipavskiy, mudofaa vaziri Yana Chernoxova, moliya vaziri Zbinek Stanyura, transport vaziri Martin Kupka va bosh vazirning uch o‘rinbosari bor.
Uchrashuvda Ukrainaning urushdan keyingi tiklanishi va Chexiyadagi ukrainalik qochqinlar bilan bog‘liq muammolar muhokama qilindi, deb yozadi telekanal Lipavskiyning bayonotiga tayanib. Uning so‘zlariga ko‘ra, muzokaralar mavzularidan biri Ukrainaning Yevropa Ittifoqiga integratsiyalashuvini qo‘llab-quvvatlash bo‘lmoqda.
Chexiya hozirda Yevropa Ittifoqi kengashiga raislik qilmoqda. Bu Fialaning Ukrainada Rossiya bosqini boshlanganidan beri Kiyevga birinchi tashrifi emas. Xususan, u mart oyida Polsha va Sloveniya bosh vazirlari bilan birga shaharga kelgan edi. O‘shanda siyosatchilar Ukraina prezidenti Vladimir Zelenskiy va bosh vazir Denis Shmigal bilan uchrashgan.
Chexiya delegatsiyasi Kiyevga 31-oktabr kuni ertalab yetib kelgan, bu paytda shaharda ketma-ket portlashlar sodir bo‘lib, Ukrainaning butun hududida havo trevogasi e’lon qilindi. Muhim infratuzilma obyektlariga zarbalar berilgan, oqibatda shaharning bir qismida elektr va suv ta’minoti yo‘qoldi.
Infratuzilma obyektlariga berilgan zarbalardan keyin Ukrainada temir yo‘l liniyalarining bir qismi tokdan uzilib qoldi. Yo‘nalishlarga teplovozlar chiqarildi. Rossiya Ukraina infratuzilmasiga 10-oktabrdan buyon zarbalar bermoqda. Bunday zarbalar Qrim ko‘prigidagi portlashdan keyin boshlangan, uni esa, Rossiya hukumati fikricha, Ukraina maxsus xizmatlari uyushtirgan. Rossiya Mudofaa vazirligi zarbalar nishoni harbiy boshqaruv tizimi, aloqa va energetika obyektlari ekanini aytdi. Ukraina energetika infratuzilmasining qariyb 40 foiziga zarar yetdi, degandi mamlakat energetika vaziri maslahatchisi Aleksandr Xarchenko. Kiyevda noma’lum muddatga elektr tokini shoshilinch o‘chirish joriy qilindi. Shahar hukumati “to‘liq blekaut” yuz berishi, eng yomon holatda esa issiqlik ta’minoti o‘chishini istisno qilmayapti.
Izoh (0)