Қорабоғ можаросига қачондир чек қўйиш керак, деди Россия президенти Владимир Путин Арманистон бош вазири Никол Пашинян билан учрашувда.
«Биз ҳамкасбларимизнинг Арманистон—Озарбайжон чегараси ва Қорабоғ атрофида содир бўлаётган воқеаларга ёндашувларини кўрдик. Бу можаро ўн йилдан бери давом этмоқда, шу сабаб қачондир буларнинг ҳаммасига барҳам бериш керак, шундайми? Биламан, бунинг учун сизда сиёсий хоҳиш бор ва биз буни ҳар томонлама қўллаб-қувватлаймиз», — деди Россия раҳбари Арманистон бош вазирига.
Путиннинг сўзларига кўра, энг муҳими — Қорабоғда тинчлик ва барқарорликни таъминлаш, транспорт инфратузилмасини блокдан чиқариш.
31 октябрь куни Россия—Арманистон—Озарбайжон уч томонлама саммити ҳам режалаштирилган бўлиб, унда давлатлар раҳбарлари Қорабоғдаги вазиятни тартибга солишни муҳокама қилади. Саммитда томонлар бўлажак тинчлик шартномасининг асосини ташкил этувчи ҳужжатни қабул қилиши мумкин.
Томонлар Қорабоғда Россия тинчликпарвар кучларининг қолишини 10—20 йилга узайтириш масаласига ҳам тўхталиши мумкин. Россия етакчисининг матбуот котиби Дмитрий Песков ушбу ҳужжатни имзолаш истиқболи ҳақида гапирар экан, олдиндан бир нарса демасликни ва музокаралар натижасини кутишни таклиф қилди.
Изоҳ (0)