Lukashenko yaqin orada Putin bilan uchrashuv o‘tkazishini ma’lum qildi

Belarus prezidenti Aleksandr Lukashenko tez orada rossiyalik hamkasbi Vladimir Putin bilan uchrashishini ma’lum qildi, deb xabar bermoqda “BelTA”.

“Yaqin kunlarda biz Vladimir Vladimirovich Putin bilan yana bir bor uchrashamiz va joriy yil yakunlarini sarhisob qilamiz. Prezidentlar darajasiga kelsak, hech bo‘lmaganda kelgusi yil uchun vazifalarimizni rejalashtiramiz”, — dedi Belarus prezidenti.

Uchrashuvda, Lukashenkoning so‘zlariga ko‘ra, boshqa masalalar qatori ikki tomonlama integratsiya va unga qaratilgan loyihalarni muhokama qilish rejalashtirilgan.

Putin va Lukashenko oxirgi marta Sochida 26-sentabr kuni uchrashgan edi. Bungacha ular Samarqandda Shanxay hamkorlik tashkiloti davlat rahbarlarining sammitida uchrashgan. Shundan so‘ng Putin belaruslik hamkasbi bilan keyingi uchrashuvda mintaqadagi vaziyat va iqtisodiy masalalarni muhokama qilishga kelishib olganini qayd etgan. Lukashenko muzokaralar chog‘ida Rossiya va Belarus o‘rtasidagi kelishuvlarda muvaffaqiyatsizlik “deyarli bo‘lmagan”ini ta’kidlagan.