Shveysariyada dunyodagi eng uzun yo‘lovchi poyezdi rekordi o‘rnatildi, deb xabar bermoqda Euronews.
Uzunligi 2 kilometr bo‘lgan poyezd Retiya temir yo‘lining eng xushmanzara hududlaridan yurib o‘tdi. 2008-yilda YUNESKO jahon merosi ro‘yxatiga kiritilgan yo‘nalish 22 ta tunnel va 48 ta ko‘prikdan o‘tadi. Butun yo‘l bir soatdan ortiq vaqtni oladi.
25 ta tarkibni birlashtirish va jahon rekordini o‘rnatish orqali Retiya temir yo‘li rahbariyati o‘zining 175 yilligini nishonlashga hamda mahalliy jamoatchilik va xorijlik sayyohlar e’tiborini jalb etishga qaror qildi. Eksperiment muvaffaqiyatga erishgan deb topilishi uchun asosiy shart tarkibni boshqarayotgan mashinistlar harakatining mutlaq sinxronizatsiyasidan iborat bo‘ldi.
Poyezdning uzunligi eng uzun qayrilma tunnel — 680 metrlik Landvasserdan qariyb uch marta ziyodroq bo‘lib, tarkibning u orqali o‘tishi tomoshabinlarni eng ko‘p zavqlantirgan narsa bo‘ldi.
“Ikki yil davom etgan koronavirus pandemiyasi natijasida biz o‘z aylanmamizning 30 foizini yo‘qotdik, shu sababli dunyodagi odamlarni YUNESKO jahon merosiga kiritilgan ajoyib yo‘nalishimiz haqida xabardor qilish uchun munosib voqea yaratishga urindik”, — dedi Retiya temir yo‘li bosh direktori Renato Fashiati.
Izoh (0)