Braziliya sobiq prezidenti Luis Inasiu Lula da Silva prezident saylovining ikkinchi bosqichida amaldagi davlat rahbari Jair Bolsonaru ustidan g‘alaba qozondi, deb yozadi “RBK” mamlakat oliy saylov sudi ma’lumotlariga tayanib.
Ovozlarning 99,26 foizi hisoblab chiqilganidan keyin Lula da Silva 50,85 foiz, Bolsonaru esa 49,15 foiz ovoz to‘plagani ma’lum bo‘ldi.
Braziliyada prezident saylovlarining birinchi bosqichi 3-oktabrda bo‘lib o‘tgan, biroq nomzodlarning hech biri 50 foizdan ortiq ovoz yig‘a olmagan edi. Yakuniy bosqichga amaldagi prezident, Sotsial-liberal partiya yetakchisi Jair Bolsonaru va “Braziliya umid federatsiyasi” sotsialistik koalitsiyasidan nomzod Luis Inasiu Lula da Silva chiqdi. Lula da Silva 2003—2010-yillarda Braziliya prezidenti bo‘lgan.
Birinchi bosqichda Lula ovozlarning 47,98 foizini, Bolsonaru esa 43,59 foizini qo‘lga kiritgan edi. Unda jami to‘qqiz kishi qatnashgan, ammo bu ikkalasi katta farq bilan oldinga chiqqan. Qolgan nomzodlar hatto 1 foiz ovoz ham to‘play olmagan.
Bolsonaru 2018-yil kuzida birinchi marta prezident etib saylangan, 2019-yil yanvarida esa lavozimiga kirishgan edi. U o‘zining o‘ta o‘ng va populistik qarashlari, Braziliya harbiy diktaturasiga moyilligi hamda feminizm va LGBT-hamjamiyatlariga qarshi nutqlari bilan tanilgan. Rossiya Ukrainada maxsus operatsiya boshlagach, u Braziliya betaraflik pozitsiyasini egallashini va Moskvaga qarshi sanksiyalar kiritmasligini ma’lum qildi.
2016-yilda Lula Petrobras davlat neft kompaniyasida korrupsiya va pul yuvish haqidagi ish bo‘yicha 12 yilga hukm qilingan edi. Bu voqea atrofidagi mojaro natijasida 2016-yilda Dilma Russefga nisbatan ham impichment e’lon qilindi. U Lulaning prezident lavozimidagi davomchisi va Ishchilar partiyasi bo‘yicha maslakdoshi edi. Sobiq prezidentning o‘zi, apellyatsiya huquqidan foydalanib, ozodlikda yurgan, 2021-yilda esa Braziliya Oliy sudi unga nisbatan hukmlarni bekor qilgan.
Izoh (0)