Бразилия собиқ президенти Луис Инасиу Лула да Сильва президент сайловининг иккинчи босқичида амалдаги давлат раҳбари Жаир Болсонару устидан ғалаба қозонди, деб ёзади «РБК» мамлакат олий сайлов суди маълумотларига таяниб.
Овозларнинг 99,26 фоизи ҳисоблаб чиқилганидан кейин Лула да Сильва 50,85 фоиз, Болсонару эса 49,15 фоиз овоз тўплагани маълум бўлди.
Бразилияда президент сайловларининг биринчи босқичи 3 октябрда бўлиб ўтган, бироқ номзодларнинг ҳеч бири 50 фоиздан ортиқ овоз йиға олмаган эди. Якуний босқичга амалдаги президент, Социал-либерал партия етакчиси Жаир Болсонару ва «Бразилия умид федерацияси» социалистик коалициясидан номзод Луис Инасиу Лула да Сильва чиқди. Лула да Сильва 2003—2010 йилларда Бразилия президенти бўлган.
Биринчи босқичда Лула овозларнинг 47,98 фоизини, Болсонару эса 43,59 фоизини қўлга киритган эди. Унда жами тўққиз киши қатнашган, аммо бу иккаласи катта фарқ билан олдинга чиққан. Қолган номзодлар ҳатто 1 фоиз овоз ҳам тўплай олмаган.
Болсонару 2018 йил кузида биринчи марта президент этиб сайланган, 2019 йил январида эса лавозимига киришган эди. У ўзининг ўта ўнг ва популистик қарашлари, Бразилия ҳарбий диктатурасига мойиллиги ҳамда феминизм ва ЛГБТ-ҳамжамиятларига қарши нутқлари билан танилган. Россия Украинада махсус операция бошлагач, у Бразилия бетарафлик позициясини эгаллашини ва Москвага қарши санкциялар киритмаслигини маълум қилди.
2016 йилда Лула Petrobras давлат нефть компаниясида коррупция ва пул ювиш ҳақидаги иш бўйича 12 йилга ҳукм қилинган эди. Бу воқеа атрофидаги можаро натижасида 2016 йилда Дилма Руссефга нисбатан ҳам импичмент эълон қилинди. У Луланинг президент лавозимидаги давомчиси ва Ишчилар партияси бўйича маслакдоши эди. Собиқ президентнинг ўзи, апелляция ҳуқуқидан фойдаланиб, озодликда юрган, 2021 йилда эса Бразилия Олий суди унга нисбатан ҳукмларни бекор қилган.
Изоҳ (0)