Braziliya Liberal partiyasi 2022-yilning kuzida bo‘lib o‘tadigan prezidentlik saylovlariga amaldagi davlat rahbari Jair Bolsonaruni rasman nomzod qilib ko‘rsatdi. Bu haqda G1 internet portali xabar berdi.
Sobiq mudofaa vaziri Volter Braga Nettu esa vitse-prezidentlikka nomzod sifatida tasdiqlandi.
Braziliyaning G1 portali ma’lum qilishicha, Bolsonaruning Liberal partiya qurultoyidagi nutqi 1 soat-u 9 daqiqa davom etgan. Nutq davomida u o‘z tarafdorlarini 7-sentabr kuni “oxirgi marta ko‘chaga chiqishga” chaqirgan, shuningdek, saylovlardagi ehtimoliy raqibi, sobiq prezident Lulu da Silvani “bandit” va “sobiq mahbus” deb atagan.
Avvalroq da Silva uchinchi prezidentlik muddati uchun nomzodini qo‘ymoqchiligi, u bilan birga San-Pauluning sobiq gubernatori Jeraldo Alkmin vitse-prezidentlikka da’vogarlik qilmoqchiligi haqida e’lon qilgandi.
Datafolha institutining so‘nggi so‘rov natijalariga ko‘ra, braziliyaliklarning 47 foizi Lula da Silva uchun, respondentlarning 28 foizi esa Bolsonaru uchun ovoz berishni rejalashtirgan.
Mavzuga doir: Hindiston tarixida ikkinchi marta ayol kishi mamlakat prezidenti bo‘ldi
Izoh (0)