Buyuk Britaniya sobiq bosh vaziri Liz Trassning telefoni buzib kirilgan, undagi maxfiy yozishma ma’lumotlari sizib chiqqan, deb xabar bermoqda Daily Mail tabloid manbalari. Gazeta ma’lumotlariga ko‘ra, xakerlikda “Rossiya uchun ishlashi aytilgan agentlar” gumon qilinmoqda. Moskva bu xabarlarga hali munosabat bildirmadi.
Daily Mail yozishicha, xakerlik haqida Konservativlar partiyasi yetakchiligi uchun yozgi saylov poygasi vaqtida ma’lum bo‘lgan. O‘sha paytda Trass xonim Britaniya Tashqi ishlar vazirligining rahbari edi. Xakerlar o‘tgan yil davomida yozishmalarga, jumladan, maxfiy ma’lumotlardan iborat xabarlarga, Britaniya va uning ittifoqchilari o‘rtasidagi muzokaralar va Ukrainaga qurol-yarog‘ yetkazib berish haqidagi xabarlarga kirish imkoniga ega bo‘lgan.
Gazeta manbalarining ta’kidlashicha, o‘sha paytdagi bosh vazir vazifasini bajaruvchi Boris Jonson bu hodisani yashirishga buyruq bergan. Boshqa narsalar qatorida, Liz Trassning do‘sti Kvazi Kvarteng bilan yozishmalar ham sizib chiqqan — Kvarteng keyinchalik Moliya vaziri bo‘lib ishlagan edi. Yozda Trass 10 yildan ortiq ishlatib kelgan telefon raqamini o‘zgartirgani ham ma’lumotni bilvosita tasdiqlaydi.
Hukumat xakerlik haqidagi xabarni na tasdiqladi, na inkor qildi. Rasmiylar “shaxs xavfsizligini ta’minlash choralari” haqida izoh bermasligini aytdi. Ular faqat hukumatda “kiber tahdidlardan himoyalashning yaxshi tashkil etilgan tizimlari” borligini ta’kidladi. Britaniya parlamenti mudofaa qo‘mitasi rahbari Tobias Ellvud Sky News’ga “Parlamentning razvedka va xavfsizlik qo‘mitasi qo‘shimcha tekshiruv o‘tkazishi kerak”, dedi.
Liz Trass Buyuk Britaniya hukumatini 2022-yilning 6-sentabridan 25-oktabrigacha boshqargan. U Boris Jonson iste’foga chiqqanidan keyin saylovda g‘alaba qozondi, ammo iqtisodiy siyosatdagi muvaffaqiyatsizlikdan keyin o‘zi ham iste’foga chiqdi. 25-oktabrdan boshlab Britaniya bosh vaziri lavozimini Rishi Sunak egallab kelmoqda.
Izoh (0)