Rossiya agressiyasi oqibatida Mariupolga yetkazilgan zarar 12,5—14,5 milliard dollarga baholanmoqda, dedi shahar meri Vadim Boychenko. Bu haqda Mariupol shahar kengashi matbuot xizmati xabar berdi.
“2600 ta ko‘p qavatli uyning yarmi vayron bo‘lgan. Hisob-kitoblarimizga ko‘ra, jami 33 ming infratuzilma obyekti zarar ko‘rgan. Rossiya bizning shahrimizga tovon to‘lashi kerak”, — deya ta’kidladi mer Boychenko.
Uning qayd etishicha, “rus bosqinchilari o‘zlarining harbiy jinoyatlari izini yo‘q qilish uchun uylarni vayron qilishda davom etmoqda”.
“Ammo ular ro‘yxatga olib qo‘yilgan. Shunday ekan, Rossiya o‘z jinoyatlari uchun javobgarlikdan qutula olmaydi”, — dedi Mariupol meri.
Avval Birlashgan Millatlar Tashkilotining madaniyat bo‘yicha agentligi YUNESKO Rossiyaning Ukrainaga bostirib kirishi oqibatida madaniy obidalarning qanchasiga zarar yetganini ma’lum qilgan edi. Unga ko‘ra, urush mobaynida Ukrainadagi 207 ta madaniy obida zarar ko‘rgan.
Shu bilan birga, hozircha Ukraina hududida joylashgan yettita jahon merosining birortasiga zarar yetmagan.
Izoh (0)