Чехия бош вазири Пётр Фиала бошчилигидаги ҳукумат делегацияси Киевга келди, деб хабар бермоқда Cеска Телевизе.
Фиаладан ташқари делегация таркибида Чехия ташқи ишлар вазири Ян Липавский, мудофаа вазири Яна Чернохова, молия вазири Збинек Станюра, транспорт вазири Мартин Купка ва бош вазирнинг уч ўринбосари бор.
Учрашувда Украинанинг урушдан кейинги тикланиши ва Чехиядаги украиналик қочқинлар билан боғлиқ муаммолар муҳокама қилинди, деб ёзади телеканал Липавскийнинг баёнотига таяниб. Унинг сўзларига кўра, музокаралар мавзуларидан бири Украинанинг Европа Иттифоқига интеграциялашувини қўллаб-қувватлаш бўлмоқда.
Чехия ҳозирда Европа Иттифоқи кенгашига раислик қилмоқда. Бу Фиаланинг Украинада Россия босқини бошланганидан бери Киевга биринчи ташрифи эмас. Хусусан, у март ойида Польша ва Словения бош вазирлари билан бирга шаҳарга келган эди. Ўшанда сиёсатчилар Украина президенти Владимир Зеленский ва бош вазир Денис Шмигал билан учрашган.
Чехия делегацияси Киевга 31 октябрь куни эрталаб етиб келган, бу пайтда шаҳарда кетма-кет портлашлар содир бўлиб, Украинанинг бутун ҳудудида ҳаво тревогаси эълон қилинди. Муҳим инфратузилма объектларига зарбалар берилган, оқибатда шаҳарнинг бир қисмида электр ва сув таъминоти йўқолди.
Инфратузилма объектларига берилган зарбалардан кейин Украинада темир йўл линияларининг бир қисми токдан узилиб қолди. Йўналишларга тепловозлар чиқарилди. Россия Украина инфратузилмасига 10 октябрдан буён зарбалар бермоқда. Бундай зарбалар Қрим кўпригидаги портлашдан кейин бошланган, уни эса, Россия ҳукумати фикрича, Украина махсус хизматлари уюштирган. Россия Мудофаа вазирлиги зарбалар нишони ҳарбий бошқарув тизими, алоқа ва энергетика объектлари эканини айтди. Украина энергетика инфратузилмасининг қарийб 40 фоизига зарар етди, деганди мамлакат энергетика вазири маслаҳатчиси Александр Харченко. Киевда номаълум муддатга электр токини шошилинч ўчириш жорий қилинди. Шаҳар ҳукумати «тўлиқ блекаут» юз бериши, энг ёмон ҳолатда эса иссиқлик таъминоти ўчишини истисно қилмаяпти.
Изоҳ (0)