Vlad Yatsenko bilan birga Revolut bank servisiga asos solgan biznesmen Nikolay Storonskiy Rossiya fuqaroligidan voz kechdi. Bu haqda Britaniyaning The Telegraph nashri Revolut vakillariga tayanib xabar berdi. Shuningdek, Storonskiy Rossiya fuqaroligidan bosh tortganini Revolut Forbes jurnalistlariga ham tasdiqlagan.
Kompaniya vakillari aytishicha, Storonskiy Rossiya fuqaroligidan “shu yil avvalroq” chiqqan. Revolut bunday qaror sabablariga to‘xtalib o‘tirmadi, faqat “Nik — Buyuk Britaniya fuqarosi” ekanini ma’lum qildi.
Shu bilan birga, The Telegraph yozishicha, Revolut vakillari Storonskiyning RF fuqaroligidan voz kechishi Ukrainadagi urush bilan bog‘liqligini bildirgan holda, biznesmen “qat’iyan jangovar harakatlarni zudlik bilan to‘xtatishga chaqirishi”ni ta’kidlagan.
Forbes eslatishicha, Ukraina Nikolay Storonskiyning otasi — “Gazprom promgaz” AJ bosh direktoriga qarshi sanksiyalar kiritgan.
Nikolay Storonskiy ukrainalik Vlad Yatsenko bilan birgalikda 2015-yilda Buyuk Britaniyada Revolut bank servisini ishga tushirgandi.
Kompaniya Rossiya Ukrainaga bostirib kirishi tufayli Yevroittifoq tomonidan joriy qilingan sanksiyalarning barchasiga rioya etishini, shu jumladan, Rossiyadan pul o‘tkazmalarini qo‘llab-quvvatlamasligini ma’lum qilgan.
Storonskiy 2022-yilda Forbes’ning eng boy rossiyalik biznesmenlar reytingiga kiritilgan. Uning davlati 7,1 milliard dollarga baholanib, 16-o‘ringa loyiq deb topilgan.
Avvalroq tadbirkor va investor, DST Global investitsiyaviy fondi egasi milliarder Yuriy Milner Rossiya fuqaroligidan voz kechgani ma’lum bo‘lgandi.
Sentabr boshida rossiyalik va armanistonlik tadbirkor va investor Ruben Vardanyan Rossiya fuqaroligidan voz kechib, tan olinmagan Tog‘li Qorabog‘ Respublikasiga ko‘chib o‘tganini ma’lum qilgandi.
Shuningdek, iyun oyida Freedom Finance sarmoya kompaniyasi asoschisi Timur Turlov Rossiya fuqaroligidan voz kechib, Qozog‘iston pasportini olganini ma’lum qilgandi.
2022-yil aprelida Rossiyaga aloqador bo‘lgan bir qator tadbirkorlar Forbes jurnaliga murojaat qilib, ularni “rossiyalik biznesmenlar” deb atamaslikni so‘ragan. Ular orasida Nikolay Storonskiy va Yuriy Milner ham bo‘lgan.
Izoh (0)