O‘zbekistonda kardiojarrohlik muolajalari soni 613 tadan 5106 taga yetkazildi, deb xabar bermoqda SSV matbuot xizmati.
Tahlillarga ko‘ra, jahonda yuz berayotgan o‘lim holatlarining qariyb 60 foizi yurak-qon tomir tizimi kasalliklari oqibatida kelib chiqmoqda. Bu turdagi xastaliklar hanuz nogironlikka yetaklovchi eng asosiy sabablardan biri. Shu sababli O‘zbekistonda mazkur yo‘nalishda eng ilg‘or innovatsion texnologiyalar, tashxislash va muolaja usullarini joriy etishga katta e’tibor qaratilyapti.
Xususan, keyingi ikki yilda mazkur sohada koronarografiya amaliyoti — 3,8 barobar, stentlash operatsiyalari — 4,3 barobar, kardiojarrohlik muolajalari soni — 613 dan 5 106 taga oshirildi.
Amalga oshirilayotgan profilaktik va davolash choralari tufayli yurak-qon tomir kasalliklaridan o‘lim ko‘rsatkichi o‘tgan yilgi 61,7 foizdan 56,2 foizgacha kamaydi. Kardioxirurgiya sohasida hududlarda yuqori texnologik jarrohlik amaliyotlari turi bosqichma-bosqich 15 tadan 35 tagacha oshirildi.
Misol uchun, Xorazm, Qashqardaryo, Samarqand, Jizzax viloyatlarida 40 turdan ortiq yuqori texnologik kardiojarrohlik amaliyotlari yo‘lga qo‘yildi. Natijada ushbu hududlardan markazga bemorlarning murojaatlari 40 foizga kamaydi.
Ikki hududda ilk bor transkateter orqali aorta qopqog‘ini o‘rnatish, onkologik kasalliklarda arteriyaning kimyoviy embolizatsiyasi, aorta anevrizmasiga stent-graft o‘rnatish amaliyotlari bajarildi.
Davlat statistika qo‘mitasi ma’lumotlariga ko‘ra, 2022-yilning 1-oktabr holatiga O‘zbekistonda qayd etilgan o‘lim holatining 56,8 foizi qon aylanish tizimi kasalliklariga to‘g‘ri keldi.
Tibbiyot, xususan, kardiologiya sohasiga qaratilayotgan e’tibor, uning moddiy-texnik bazasini rivojlantirish va hududlarda yo‘lga qo‘yilgan yuqori texnologik jarrohlik amaliyotlari natijasida keyingi yillarda bu borada bir qator ijobiy natijalarga erishilmoqda. Xususan, 2022-yilning 9 oyi davomida yurak-qon tomir kasalliklaridan o‘lim ko‘rsatkichi 56,2 foizga kamaydi.
Izoh (0)