O‘zbekistonga 2022-yilning 9 oyi davomida 318 156 nafar Rossiya fuqarosi kirib kelgani haqida xabar berilgan edi. Shundan 18 kishi O‘zbekiston fuqaroligiga qabul qilingan.
IIV Migratsiya va fuqarolikni rasmiylashtirish bosh boshqarmasi boshlig‘i polkovnik Ulug‘bek Muhamedov O‘zAga bergan intervyusida ma’lum qilishicha, Rossiya fuqarolarining aksariyati O‘zbekistonga doimiy yashash yoki fuqarolikni olish maqsadida emas, vaqtincha yashash maqsadida kirib kelmoqda.
2021-yil 9 oyi davomida IIV Migratsiya va fuqarolikni rasmiylashtirish bosh boshqarmasining hududiy bo‘linmalari tomonidan 1646 nafar chet el fuqarosi va fuqaroligi bo‘lmagan shaxslar turgan joyi bo‘yicha doimiy ro‘yxatga olingan bo‘lsa, 2022-yilning 9 oyi davomida 1821 nafar chet el fuqarosi va fuqaroligi bo‘lmagan shaxslar doimiy ro‘yxatga olingan. Ularga chet el fuqarosi uchun mo‘ljallangan yashash guvohnomasi — ID-kartalar rasmiylashtirib berilgan.
O‘zbekistonga 2022-yilning 9 oyi davomida kelgan rossiyaliklarning 210 ming 902 nafari erkaklar, 107 ming 254 nafari ayollar bo‘lgan. 18—30 yosh oralig‘ida bo‘lganlar 109 ming 417 nafarini, 30—55 yosh oralig‘ida bo‘lganlar 117 ming 625 nafarini, 55 yoshdan yuqori bo‘lganlar 73 ming 858 nafari tashkil etadi.
Izoh (0)