Shavkat Mirziyoyev Seulda yuz bergan fojia oqibatida ko‘plab insonlar halok bo‘lgani munosabati bilan Janubiy Koreya prezidenti Yun Sok Yolga ta’ziya yo‘lladi.
Prezident matbuot kotibining ma’lum qilishicha, davlat rahbari qurbon bo‘lganlarning oila a’zolari va yaqinlariga hamdardlik bildirdi, jarohat olganlar tez fursatda sog‘ayib ketishlarini tiladi.
29-oktabr kuni Janubiy Koreya poytaxti Seul shahri markazida Xellouin bayramini nishonlash vaqtida yuz bergan tiqilinch sabab odamlar yurak xurujiga uchragan edi. Ko‘chalar odamlar bilan gavjum bo‘lgan. Olomon o‘tib borayotganida tiqilinch yuz bergan.
So‘nggi ma’lumotlarga ko‘ra, voqea oqibatida vafot etganlar soni 151 kishiga yetgan, 82 kishi jarohatlangan. Jabrlanganlar orasida ikki nafar O‘zbekiston fuqarosi ham bor. Ulardan biri vafot etgan, ikkinchisi jarohat bilan shifoxonaga yotqizilgan. Ahvoli qoniqarli deb baholanmoqda.
Janubiy Koreya prezidenti Yun Sok Yol Seuldagi fojia munosabati bilan milliy motam e’lon qildi hamda qurbonlar va qurbonlarning oila a’zolariga hamdardlik bildirdi.
Izoh (0)