“Fuqarolik holati dalolatnomalarini yozish organlari faoliyatini yanada takomillashtirish chora-tadbirlari to‘g‘risida” hukumat qarori qabul qilindi, deb xabar bermoqda Adliya vazirligi matbuot xizmati.
Qarorga ko‘ra Toshkent, Samarqand, Buxoro, Qarshi va Guliston shaharlaridagi mavjud nikoh uylari FHDY bo‘limlari etib qayta tashkil etildi. Ushbu nikoh uylari oldin faqat nikohni qayd qilish bilan shug‘ullangan bo‘lsa, endilikda FHDY bo‘limi sifatida boshqa turdagi fuqarolik holati dalolatnomalarini qayd qilish (tug‘ilish, o‘lim, ajrim va boshqalar) bilan ham shug‘ullanadi;
Adliya vaziriga mavjud shtatlar doirasida FHDY bo‘limlarini tashkil etish va tugatish bo‘yicha qo‘shimcha vakolat berildi.
FHDY organlarida turli yillarda bir xil seriya va raqamli tug‘ilganlik haqidagi guvohnomalar rasmiylashtirib berilgani aniqlangan holatlarda, ushbu guvohnomalarni qayta rasmiylashtirish uchun gerb yig‘imi undirilmasligi belgilandi.
Shuningdek, qaror bilan Adliya vazirligiga vazirlik va idoralar, mahalliy ijro etuvchi hokimiyat organlari tomonidan huquqiy axborotni tarqatish va undan foydalanishni ta’minlash bo‘yicha amalga oshirilayotgan ishlarning holatini muntazam monitoring va tahlil qilib borish bo‘yicha qo‘shimcha vazifa yuklatildi.
Respublika bo‘ylab FHDY bo‘limlari soni ortishi navbatlar kamayishi, masofalar qisqarishi, fuqarolarning vaqti va boshqa resurslari tejalishi hamda xizmat sifatining ortishiga olib kelishi kutilmoqda.
Mavzuga doir: O‘zbekistonda endi nikohlanishga ariza berganlar mahalla fuqarolar yig‘inini xabardor qilishi shart bo‘lmaydi
Izoh (0)