Rossiyaning pozitsiyasi shundan iboratki, Armaniston va Ozarbayjon tinchlik shartnomasiga muhtoj, biroq Moskva Yerevanga bosim qilmaydi va uning har qanday tanlovini qo‘llab-quvvatlaydi. Bu haqda Rossiya prezidenti Vladimir Putin ma’lum qildi. Putinning aytishicha, u Armanistonga Qorabog‘dagi beshta tumanni Ozarbayjonga berishni taklif qilgan, biroq Armaniston hukumati bunga rozi bo‘lmagan.
“Ular (tumanlar) keraksiz, ahamiyatsiz, shunchaki bo‘sh. Odamlar bu hududlardan chiqib ketgan, aniqrog‘i quvilgan. Ularni saqlab turishdan ma’no yo‘q. Qorabog‘ bilan bog‘lanish uchun esa ikkita katta tuman yetarli. Biz qochqinlarni qaytarish adolatdan bo‘ladi, deb hisoblaymiz. Bu butun mintaqadagi vaziyatni normallashtirish yo‘lidagi yaxshi qadam bo‘lar edi. Ammo Armaniston rahbariyati o‘z yo‘lidan ketdi. Ma’lumki, bu bugungi vaziyatga olib keldi”, — dedi Vladimir Putin “Valday” xalqaro munozara klubining XIX yig‘ilishi yalpi majlisidagi nutqida.
“Qaysi variant tanlanmasin, agar u tinchlikka olib kelsa, barchamiz uning tarafdorimiz. Ammo biz hech narsaga majburlamoqchi emasmiz”, — deya qo‘shimcha qildi Rossiya prezidenti.
Sentabr oyida Armaniston va Ozarbayjon chegarasida vaziyat keskinlashgan edi. Armaniston bosh vaziri Nikol Pashinyan 31-oktabr kuni Sochida Rossiya prezidenti va Ozarbayjon prezidenti Ilhom Aliyev bilan uchrashishi kutilmoqda. Pashinyan va Aliyev o‘rtasidagi so‘nggi uchrashuv 6-oktabr kuni Pragada bo‘lib o‘tgan. Shundan so‘ng Ozarbayjon prezidenti tinchlik shartnomasi yil oxirigacha imzolanishi mumkinligini aytgan. Armaniston Xavfsizlik Kengashi ham xuddi shunday bayonot bilan chiqqan. Shu bilan birga, oktabr oyida tomonlar muntazam ravishda bir-birini chegarada o‘t ochishda aybladi.
Izoh (0)