Россиянинг позицияси шундан иборатки, Арманистон ва Озарбайжон тинчлик шартномасига муҳтож, бироқ Москва Ереванга босим қилмайди ва унинг ҳар қандай танловини қўллаб-қувватлайди. Бу ҳақда Россия президенти Владимир Путин маълум қилди. Путиннинг айтишича, у Арманистонга Қорабоғдаги бешта туманни Озарбайжонга беришни таклиф қилган, бироқ Арманистон ҳукумати бунга рози бўлмаган.
«Улар (туманлар) кераксиз, аҳамиятсиз, шунчаки бўш. Одамлар бу ҳудудлардан чиқиб кетган, аниқроғи қувилган. Уларни сақлаб туришдан маъно йўқ. Қорабоғ билан боғланиш учун эса иккита катта туман етарли. Биз қочқинларни қайтариш адолатдан бўлади, деб ҳисоблаймиз. Бу бутун минтақадаги вазиятни нормаллаштириш йўлидаги яхши қадам бўлар эди. Аммо Арманистон раҳбарияти ўз йўлидан кетди. Маълумки, бу бугунги вазиятга олиб келди», — деди Владимир Путин «Валдай» халқаро мунозара клубининг XIX йиғилиши ялпи мажлисидаги нутқида.
«Қайси вариант танланмасин, агар у тинчликка олиб келса, барчамиз унинг тарафдоримиз. Аммо биз ҳеч нарсага мажбурламоқчи эмасмиз», — дея қўшимча қилди Россия президенти.
Сентябрь ойида Арманистон ва Озарбайжон чегарасида вазият кескинлашган эди. Арманистон бош вазири Никол Пашинян 31 октябрь куни Сочида Россия президенти ва Озарбайжон президенти Илҳом Алиев билан учрашиши кутилмоқда. Пашинян ва Алиев ўртасидаги сўнгги учрашув 6 октябрь куни Прагада бўлиб ўтган. Шундан сўнг Озарбайжон президенти тинчлик шартномаси йил охиригача имзоланиши мумкинлигини айтган. Арманистон Хавфсизлик Кенгаши ҳам худди шундай баёнот билан чиққан. Шу билан бирга, октябрь ойида томонлар мунтазам равишда бир-бирини чегарада ўт очишда айблади.
Изоҳ (0)