AQSH B83-1 termoyadro bombasini yo‘q qiladi. Bu haqda Pentagon tomonidan chop etilgan Milliy mudofaa strategiyasida aytilgan. Defence News ta’kidlashicha, bu AQSH yadroviy arsenalidagi so‘nggi megaton bombadir. Pentagon, shuningdek, dengizda uchiriladigan yadroviy qanotli raketa yaratish dasturini bosqichma-bosqich bekor qilishini e’lon qildi.
“B83-1 bombasi imkoniyatlari cheklangani va unga texnik xizmat ko‘rsatish xarajatlari oshgani tufayli yo‘q qilinadi”, — deyiladi hujjatda.
B83 — termoyadroviy bomba bo‘lib, 1983-yildan beri AQSH qurollari tarkibida. U chuqur joylashgan nishonlar uchun mo‘ljallangan. Uning maksimal quvvati trotil ekvivalentida 1,2 megatonni tashkil qiladi.
Jo Bayden ma’muriyatining eskirgan yadro qurollarini yo‘q qilish rejalari avvalroq Kongressda bahs-munozaralarga sabab bo‘lgan edi. Jumladan bir necha respublikachilar B83 bombasini yo‘q qilishga qarshi chiqqan, deb yozadi Defense News.
Vakillar palatasi a’zosi, respublikachi Dug Lamborn jangovar kallakning nafaqat muqobili yo‘qligi, balki uning o‘rnini bosuvchi qurol qidirilmayotganidan norozi bo‘lgan. “Har qanday yadroviy salohiyatni kamaytirishga urinish shuni anglatadiki, bu ma’muriyat biz duch kelayotgan tahdidlar haqiqatiga qarshi turishni yo xohlamayapti yoki bunga qodir emas”, — dedi u.
Demokratik senatorlar Dayan Faynshteyn va Ed Marki esa B83 ni muddatidan oldin yo‘qotishni yoqlab chiqdi. “Hech bir aqli raso rahbar Xirosimaga tashlangan bombadan 100 baravar kuchliroq bo‘lgan yadro bombasini takomillashtirishni xayoliga ham keltirmaydi”, — dedi Marki.
Defence News ta’kidlashicha, 2021-yili Kongress B83 uchun 52 million dollar mablag‘ ajratgan, ammo endi Bayden ma’muriyati mablag‘ ajratishni to‘xtatishga harakat qilmoqda, respublikachilar, aftidan, demokratlarning bombani ushlab turishiga umid qila olmaydi. Ayni damda demokratlar Vakillar palatasi va Senatda ko‘pchilikni tashkil etadi, oraliq muddatli Kongress saylovlari esa 8-noyabrda bo‘lib o‘tadi.
Izoh (0)