АҚШ B83-1 термоядро бомбасини йўқ қилади. Бу ҳақда Пентагон томонидан чоп этилган Миллий мудофаа стратегиясида айтилган. Defence News таъкидлашича, бу АҚШ ядровий арсеналидаги сўнгги мегатон бомбадир. Пентагон, шунингдек, денгизда учириладиган ядровий қанотли ракета яратиш дастурини босқичма-босқич бекор қилишини эълон қилди.
«B83-1 бомбаси имкониятлари чеклангани ва унга техник хизмат кўрсатиш харажатлари ошгани туфайли йўқ қилинади», — дейилади ҳужжатда.
B83 — термоядровий бомба бўлиб, 1983 йилдан бери АҚШ қуроллари таркибида. У чуқур жойлашган нишонлар учун мўлжалланган. Унинг максимал қуввати тротил эквивалентида 1,2 мегатонни ташкил қилади.
Жо Байден маъмуриятининг эскирган ядро қуролларини йўқ қилиш режалари аввалроқ Конгрессда баҳс-мунозараларга сабаб бўлган эди. Жумладан бир неча республикачилар Б83 бомбасини йўқ қилишга қарши чиққан, деб ёзади Defense News.
Вакиллар палатаси аъзоси, республикачи Дуг Ламборн жанговар каллакнинг нафақат муқобили йўқлиги, балки унинг ўрнини босувчи қурол қидирилмаётганидан норози бўлган. «Ҳар қандай ядровий салоҳиятни камайтиришга уриниш шуни англатадики, бу маъмурият биз дуч келаётган таҳдидлар ҳақиқатига қарши туришни ё хоҳламаяпти ёки бунга қодир эмас», — деди у.
Демократик сенаторлар Даян Файнштейн ва Эд Марки эса B83 ни муддатидан олдин йўқотишни ёқлаб чиқди. «Ҳеч бир ақли расо раҳбар Хиросимага ташланган бомбадан 100 баравар кучлироқ бўлган ядро бомбасини такомиллаштиришни хаёлига ҳам келтирмайди», — деди Марки.
Defence News таъкидлашича, 2021 йили Конгресс B83 учун 52 миллион доллар маблағ ажратган, аммо энди Байден маъмурияти маблағ ажратишни тўхтатишга ҳаракат қилмоқда, республикачилар, афтидан, демократларнинг бомбани ушлаб туришига умид қила олмайди. Айни дамда демократлар Вакиллар палатаси ва Сенатда кўпчиликни ташкил этади, оралиқ муддатли Конгресс сайловлари эса 8 ноябрда бўлиб ўтади.
Изоҳ (0)