Rossiya prezidenti Vladimir Putin fevral oyida Pekinga tashrifi chog‘ida Xitoy raisi Si Szinpinni Ukrainada harbiy operatsiya boshlashi haqida ogohlantirmagan. Bu haqda u “Valday” xalqaro munozaralar klubi yig‘ilishida aytib o‘tdi, deb yozadi “RBK”.
U Si Szinpinni maxsus operatsiya boshlash rejalari haqida xabardor qilgan-qilmagani haqidagi savolga “Yo‘q”, — deb javob berdi.
Shundan keyin Rossiya prezidentiga “Xitoy yetakchisi uni bu rejalardan xabardor qilmagani uchun xafa bo‘lganini bildirmadimi?” — qabilida savol berishdi. “Bilasiz, Xitoy yetakchisi nimadandir xafa bo‘lganini aytadigan odam emas. U jahon miqyosidagi mustaqil yetakchi. Undan keyin, bizda bunday zaruriyat yo‘q, biz suveren qarorlar qabul qilamiz, Rossiya ham, Xitoy Xalq Respublikasi ham”, — dedi Putin.
Uning so‘zlariga ko‘ra, NATOning o‘z infratuzilmasini Rossiya chegaralariga surib kelishga intilishi Rossiya uchun nimani bildirishini, Donbassda so‘nggi sakkiz yilda nimalar sodir bo‘lganini va 2014-yilda Ukrainadagi davlat to‘ntarishi sabablarini Pekin ko‘rib turibdi.
“Xitoy rahbariyati Ukrainadagi inqirozga tinch yo‘l bilan mantiqiy, muvozanatlashgan yechim topish tarafdori va biz bu pozitsiyaga hurmat bilan yondashamiz”, — deya qo‘shib qo‘ydi Putin.
Putin va Szinpinning nazarda tutilayotgan uchrashuvi 4-fevral kuni Pekinda bo‘lib o‘tgan. O‘shanda e’lon qilingan qo‘shma bayonotda Xitoy Rossiyaning NATO sharqqa kengaymasligi haqidagi talabini va Yevropada xavfsizlik kafolatlari bo‘yicha boshqa takliflarni qo‘llab-quvvatlagandi.
Rossiya Ukrainada harbiy operatsiya boshlaganidan buyon Xitoy betaraf pozitsiyani egallab, Ukraina hududiy yaxlitligini yoqlab kelayotgandi, ammo sanksiyalar kiritmagan. Rossiyada qisman safarbarlik e’lon qilingach, Pekin harbiy harakatlarga nuqta qo‘yish va tomonlarning xavfsizlik sohasidagi xavotirlarini bartaraf qilish uchun ularni muzokaralarga chaqirdi.
Keyinroq Xitoy Tashqi ishlar vazirligi tomonlar dastlabki shartlarsiz muzokaralarni qayta boshlashi kerakligini aytdi.
Izoh (0)