Ijtimoiy tarmoqlarda Qozog‘istonning Ulitau viloyati Janaarka tumaniga raketa kelib tushgani haqida xabarlar tarqalmoqda, deb yozadi Tengrinews. Vaziyat yuzasidan mahalliy hokimiyat izoh berdi.
Janaarka tumani aholisi Orinbay qishlog‘i yaqinidagi dashtga qulagan kosmik kema bo‘laklarini videoga olgan. Fuqarolar kema bo‘laklari odamlar sog‘lig‘i va ekologiya uchun zararli bo‘lishi mumkinligidan xavfsiramoqda.
Janaarka tumani hokimligi ma’lum qilishicha, bu yerga kelib tushgan bo‘laklar “Progress MS-21” yuk kemasiga tegishlidir.
“Bu ‘Progress MS-21’ yuk kemasining bir bo‘lagidir. U Orinbay aholi punktidan 25 km uzoqlikka qulab tushgan. Bu yerga yaqin joylashgan qishlovxona aholisi evakuatsiya qilindi. Orinbay qishlog‘i aholisini evakuatsiya qilmadik”, — deyiladi xabarda.
Ta’kidlanishicha, “Roskosmos” mutaxassislari kosmik kema yerga qulayotgani haqida oldindan bilgan va uning bo‘lagi qayerga kelib tushishini aniqlagan. “Ular tomonidan tezkor chora ko‘ruvchi maxsus guruh tuzilib, bu joyni nazorat qilib turgan. Kosmik kema birinchi pog‘onasi bo‘laklari allaqachon olib ketilgan, ular xavf tug‘dirmaydi”, — deya ma’lum qildi hokimlik matbuot xizmati.
Rossiyaning “Progress MS-21” kemasi ortilgan “Soyuz-2.1a” eltuvchi raketasi 26-oktabr kuni Qozog‘istondagi Boyqo‘ng‘ir kosmodromidan uchirilgandi. 28-oktabr kuni kema Xalqaro koinot stansiyasining Rossiya segmentiga borib tutashgani xabar berildi.
“Progress MS-21” orbital stansiyaga 2520 kg yuk, shu jumladan, 702 kg yonilg‘i, 420 kg ichimlik suvi, 41 kg azot va 1357 kg turli uskuna va materiallar, kiyim-kechak, oziq-ovqat olib chiqqan.
Ma’lumot uchun: Raketa pog‘onasi — mexanik tarzda birlashtirilgan bir nechta raketadan iborat ko‘p pog‘onali raketaning bir qismi. Pog‘onalar parvoz chog‘ida ajralib chiqadi.
Izoh (0)