MAGATE (Atom energiyasi bo‘yicha xalqaro agentlik) KXDRda yadro quroli sinovdan o‘tkazilishi ehtimoli yuzasidan xavotir bildirmoqda, deb yozadi Anadolu agentligi.
MAGATE rahbari Rafael Grossi so‘zlariga ko‘ra, KXDRda yadro quroli ishtirokidagi yangi sinovlar kuchli xavotir uyg‘otadi.
Agentlik KXDRda hisob bo‘yicha yettinchi yadro sinovlariga tayyorgarlik ko‘rilayotganini aniqlagan, biroq yadroviy portlash shu yaqin orada sodir bo‘lishidan darak beruvchi belgilar yo‘q.
“Hamma nafasini ichiga yutdi. Ilg‘orroq sinovlar shuni anglatadiki, ular tayyorgarlikni va arsenal yaratishni kuchaytirgan. Mana shuning uchun ham biz buni juda diqqat bilan kuzatyapmiz”, — dedi u.
MAGATE bu sodir bo‘lmasligiga umid qilmoqda, ammo afsuski, kuzatuvlar buning aksini ko‘rsatmoqda, dedi agentlik rahbari.
Yaponiya, AQSH va Janubiy Koreya KXDR yadro sinovlari o‘tkazgan taqdirda, unga “misli ko‘rilmagan darajada javob” qaytarishga kelishib olgandi.
2022-yil boshidan buyon Pxenyan BMT rezolyutsiyasini buzgan holda, turli masofali ballistik raketalar ishtirokida 20 dan ortiq sinovlar o‘tkazgan.
Oktabr boshlarida Shimoliy Koreya yetakchisi Kim Chen In taktik yadro bo‘linmalarining harbiy tayyorgarligini ko‘zdan kechirgani xabar berildi.
KXDR ketma-ket yadro sinovlariga tayyorlanayotgan bo‘lishi mumkinligi yuzasidan xavotirlar avval ham bildirilgan. Xususan, iyun o‘rtalarida sun’iy yo‘ldoshdan olingan fotosuratlar Shimoliy Koreya yadro poligonidagi faollikni ko‘rsatgani, u qo‘shimcha yadro sinovlari o‘tkazilishidan dalolat berishi mumkinligi aytilgandi.
6-iyun kuni MAGATE bosh kotibi Rafael Grossi agentlik Pungeri poligonida faollikni qayd etayotgani va buni yadro quroli sinovlariga ehtimoliy tayyorgarlik belgisi deb hisoblashini aytgandi. U agentlik ma’lumotlariga ko‘ra, Shimoliy Koreyaning Yonbendagi yadro obyektida ishlar davom ettirilayotganini ham ta’kidladi.
Izoh (0)