“Daryo” nashri 27-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Ilon Maskning Starlink sun’iy yo‘ldoshlariga zarba berish bilan tahdid qilmoqda.
Agar Ukraina harbiylari Starlink sun’iy yo‘ldoshlaridan foydalanishda davom etsa, bu tizimlar Rossiya Qurolli kuchlari uchun qonuniy nishonga aylanishi mumkin. Bu haqda Rossiya tashqi ishlar vazirligining Yadro qurollarini tarqatmaslik va nazorat qilish departamenti boshlig‘i o‘rinbosari Konstantin Vorontsov ma’lum qildi.
Ilon Maskning SpaceX kompaniyasiga tegishli Starlink tizimlari hozirda Ukrainaga razvedka ma’lumotlarini uzatishda va Ukraina Qurolli kuchlarini yopiq aloqa bilan ta’minlashda asosiy rol o‘ynamoqda.
Avvalroq CNN SpaceX sentabr oyida Pentagonga murojaat qilib, Ukrainada Starlink terminallari faoliyatini moliyalashtirishni so‘ragani, chunki buni o‘zi ortiq uddalay olmasligi haqida xabar bergandi. Mask o‘sha vaqtda Rossiya Ukrainada Starlink’ni “o‘ldirishga” urinayotganini, chunki bu tarmoq — jangovar harakatlar zonasida ishlashda davom etayotgan yagona aloqa tizimi ekanini aytgan edi.
“Vagner” Afg‘oniston maxsus bo‘linmalarini Ukrainadagi urush uchun yollamoqda, ular amerikalik instruktorlar tomonidan o‘qitib tayyorlangan
“Vagner” xususiy harbiy kompaniyasi Ukrainadagi urushga Afg‘oniston armiyasining elita maxsus bo‘linmalari vakillarini yollamoqda, ular amerikalik instruktorlar tomonidan o‘qitilgan va hokimiyat tepasiga “Tolibon” harakati kelganidan keyin ishsiz qolgan. Bu haqda Foreign Policy maxsus bo‘linmalar orasidagi manbalariga tayanib xabar berdi.
Foreign Policy manbalari hisob-kitoblariga ko‘ra, “Vagner” guruhiga 10 ming nafargacha afg‘on jangchilari qo‘shilishi mumkin, chunki ularning “yo‘qotadigan hech narsasi yo‘q”, shu bilan birga, ularning ko‘pchiligi toliblar rejimi bilan munosabatlarni yo‘lga qo‘yayotgan Rossiyani Afg‘onistonning dushmani deb hisoblaydi. Avvalroq Rossiya TIV AQSHni Afg‘onistondagi vaziyatni beqarorlashtirishda ayblagan edi.
Rossiya Ilon Maskning Starlink sun’iy yo‘ldoshlariga zarba berish bilan tahdid qilmoqda
Agar Ukraina harbiylari Starlink sun’iy yo‘ldoshlaridan foydalanishda davom etsa, bu tizimlar Rossiya Qurolli kuchlari uchun qonuniy nishonga aylanishi mumkin. Bu haqda Rossiya tashqi ishlar vazirligining Yadro qurollarini tarqatmaslik va nazorat qilish departamenti boshlig‘i o‘rinbosari Konstantin Vorontsov ma’lum qildi. Ilon Maskning SpaceX kompaniyasiga tegishli Starlink tizimlari hozirda Ukrainaga razvedka ma’lumotlarini uzatishda va Ukraina Qurolli kuchlarini yopiq aloqa bilan ta’minlashda asosiy rol o‘ynamoqda.
Avvalroq CNN SpaceX sentabr oyida Pentagonga murojaat qilib, Ukrainada Starlink terminallari faoliyatini moliyalashtirishni so‘ragani, chunki buni o‘zi ortiq uddalay olmasligi haqida xabar bergandi. Mask o‘sha vaqtda Rossiya Ukrainada Starlink’ni “o‘ldirishga” urinayotganini, chunki bu tarmoq — jangovar harakatlar zonasida ishlashda davom etayotgan yagona aloqa tizimi ekanini aytgan edi.
ISW: Putin Ukraina bilan muzokaralardan manfaatdor emas
Rossiya prezidenti Vladimir Putin Ukraina bilan jiddiy muzokaralardan manfaatdor emas va urushni davom ettirib, hali ham maksimalistik maqsadlar ortidan quvmoqda — Rossiya rahbarining bayonotlari shundan darak bermoqda, deb yozadi AQSHning Urushni tadqiq qilish instituti (ISW) tahlilchilari.
MDH xavfsizlik organlari va maxsus xizmatlari vakillari bilan yaqinda bo‘lib o‘tgan uchrashuvda Putin Ukraina “suverenitetini yo‘qotgani”ni va AQSH undan Rossiya, Rossiya-Belarus ittifoq davlati, KXSHT va MDHga qarshi “urib zarba berish vositasi sifatida foydalanayotgani”ni aytgan.
Rossiya Davlat dumasi spikeri Vyacheslav Volodin bu bayonotni kengaytirib, “Ukraina davlat sifatida mavjud bo‘lish imkoniyatini yo‘qotgani”, “NATO tomonidan egallab olingani” va “AQSH mustamlakasiga aylangani” haqida gapirdi. Bunday muomala nizoni tartibga solish u yoqda tursin, o‘t ochishni to‘xtatish haqida tengma-teng muzokaralarga zid keladi, deya qayd etdi tahlilchilar.
Tashqi ishlar vazirligi Ukraina hukumatiga dronlar masalasida murojaat yo‘lladi
Internet tarmog‘ida ukrainalik jurnalist va bloger Dmitriy Gordonning isroillik tadbirkor Leonid Nevzlin bilan videointervyusi tarqalib, go‘yoki unda Eronning uchuvchisiz uchoqlari (dron) O‘zbekiston hududida yig‘ilayotgani to‘g‘risida yolg‘on ma’lumotlar keltirilgan, deb bayonot bermoqda Tashqi ishlar vazirligi.
Ma’lum qilinishicha, O‘zbekiston Eron Islom Respublikasi bilan harbiy-texnik sohada hamkorlik qilmaydi va o‘z hududida Eron harbiy texnikasini yig‘maydi. Shu bilan birga, hozirgi vaqtgacha Ukraina tomonidan ham, boshqa xorijiy hamkorlardan ham “Eron dronlarini yig‘ish” masalasi bo‘yicha rasmiy murojaatlar kelib tushmagan.
Shu munosabat bilan Tashqi ishlar vazirligi Ukraina rasmiy hukumatiga Ukraina ommaviy axborot vositalarida O‘zbekiston to‘g‘risida ikki tomonlama munosabatlarga putur yetkazishi mumkin bo‘lgan bunday asossiz ayblovlar va boshqa ishonchsiz ma’lumotlar tarqatilishining oldini olish bo‘yicha tegishli choralar ko‘rishni so‘rab murojaat qildi.
Izoh (0)