Qashqadaryo viloyatining Dehqonobod tumani hokimi Zoir Aliqulov Xalq deputatlari tuman Kengashi sessiyalarida deputatlarga hududda 2,5 ming gektar maydonda pista plantatsiyasi barpo etilishi, aholi uchun arzon uy-joylar qurilishi va tumanda 500 o‘rinli tikuv fabrika qad rostlashi haqida va’da bergan edi. Xo‘sh, berilgan va’dalar bajarilyaptimi? “Daryo” muxbiri qurilish maydonida, traktor haydab yurgan Zoir Aliqulovdan shu haqda so‘radi.
Tuman hokimining “Daryo” muxbiriga ma’lumot berishicha, Dehqonobodda 2,5 ming gektar maydonda pista plantatsiyasini yaratish ishlari jadallik bilan davom etmoqda.
Dastlabki bosqichda tadbirkorlik subyekti tomonidan 367 gektar yerda pistachilik plantatsiyasi tashkil etildi. Loyihani amalga oshirish uchun tadbirkor o‘z mablag‘idan 2,7 milliard so‘m sarf qilgan bo‘lsa, bankdan 3,1 milliard so‘mlik kredit oldi. Natijada birgina shu loyiha orqali o‘nlab doimiy, yuzlab mavsumiy ish o‘rni yaratildi, — deydi tuman hokimi Zoir Aliqulov.
Hokimning ma’lumot berishicha, pistachilik bilan aholi vakillari ham foydalana boshlagan.
Tuman aholisi kelajakda 1 gektar pistazordan 88 million so‘mdan ortiq 108 million so‘m atrofida va hatto undan ham ko‘p daromad ola boshlaydi, — deydi hokim.
Dehqonobodda shuningdek, zamonaviy texnologiyalar asosida sug‘oriladigan 86 gektar maydonda ham pistachilik plantatsiyasi ishga tushgan. Umumiy maydonning 6 gektari yomg‘irlatib, qolgan qismida esa tomchilatib sug‘orish ishlari yakuniga yetkazilmoqda. E’tiborga molik jihati shundaki, hududning har bir sektoridagi pista ko‘chatlarini masofaviy usulda sug‘orish imkoniyati mavjud. Hatto mas’ullar qo‘l telefoni orqali ham bu ishni bajarish mumkin.
Ta’kidlanishicha, Prezident Shavkat Mirziyoyev topshirig‘iga bilan tumanda tashkil etilayotgan pistachilik plantatsiyasi uch bosqichda amalga oshiriladi.
Ikkinchi bosqichda tumandagi pillachilik va qorako‘lchilikni rivojlantirish qo‘mitasiga tegishli 1120 gektar yer maydoniga pista daraxti ekiladi. Loyiha qiymati 16,2 milliard so‘m bo‘lgan ish natijasida yana 217 ta doimiy, 361 ta mavsumiy ish o‘rni yaratiladi. So‘ngra o‘rmon xo‘jaligining 1000 gektar yer maydonida pistachilik plantatsiyasi tashkil etiladi.
Tumanda “Dehqonobod City” ko‘p qavatli uylar majmuasi qurilishi ham boshlab yuborildi. Majmua ochilishida hurmatli viloyat hokimimiz Murodjon Azimovning o‘zlari ishtirok etib, boshlab bergandi. Shaharcha asli dehqonobodlik tadbirkor Tohir Saidov rahbarlik qilayotgan “Sof mad Build” MCHJ tomonidan 8 gektar maydonda 1034 nafar aholiga mo‘ljallab barpo etilmoqda, — deydi Zoir Aliqulov.
Tumanda tadbirkor Shavkat Sharipov tashabbusi va homiyligida 500 ta yangi ish o‘rni yaratadigan tikuvchilik fabrikasi barpo etilmoqda. Bir gektar maydonda barpo etilishi reja qilingan korxonaning ishga tushishi 50-60 milliard so‘mga tushmoqda, — deydi tuman hokimi.
“Daryo” tuman hokimlari tomonidan berilgan va’dalar ijrosi qanday bo‘layotgani borasida qiziqishda davom etadi.
Izoh (0)