“Bu yerda senatorlar umumiy gaplarni emas, amaliy masalalarni hal qilishga harakat qilishyapti” — Sodiq Safoyev

27-oktabr kuni MDH Parlamentlararo assambleyasi doirasida Rossiya Federal Majlisi Federatsiya Kengashi va O‘zbekiston Oliy Majlisi Senati o‘rtasidagi hamkorlik bo‘yicha Parlamentlararo komissiyaning 7-majlisi o‘tkazildi, deb xabar bermoqda “Daryo” muxbiri.

Ma’lum bo‘lishicha, uchrashuvda avvalo ta’lim sohasiga e’tibor qaratildi.

Bu yerda senatorlar umumiy gaplarni emas, amaliy masalalarni hal qilishga harakat qilishyapti. Ta’lim sohasi biz uchun nihoyatda muhim masala. Mana hozir 46 ming o‘zbekistonlik yoshlar Rossiyaning oliy o‘quv yurtlarida ta’lim olmoqda, bu katta raqam. Biz birinchi navbatda ta’lim sifatiga shu bilan birga u yerda o‘qiyotgan talabalarning sharoitlari, haq-huquqlari hamda ta’lim uchun yaratilayotgan sharoitlar haqida gaplashdik. Biz yoshlarning ta’limi bilan bog‘liq barcha masalalarni doimo monitoring qilib borishimiz kerak, — deydi Sodiq Safoyev.

Shuningdek, Oliy Majlis Senati raisining birinchi o‘rinbosari mehnat migratsiyasi mavzusiga ham to‘xtalib o‘tdi.

Mehnat migratsiyasi deganda millionlab insonlarning taqdiri haqida gapiryapmiz. Bugun bizni bezovta qilayotgan masalalarni ham ilgari surdik. Ya’ni ularning haq-huquqlari, himoyalanishi, sharoitlari va bu borada kelajakda qilinadigan ishlar haqida kelishib olindi.

Bundan tashqari, hammamiz mamnuniyat bilan qayd etayotgan masala bu — Rossiyadan O‘zbekistonga kelayotgan turistik oqimning tobora ortib borishi. Buni biz, albatta, olqishlaymiz, chunki bu O‘zbekistonning iqtisodiy o‘sishi uchun kelayotgan turistlar katta omil bo‘lishi mumkin va bugun bu borada axborot almashinuvini tizimli ravishda yo‘lga qo‘yish zaruriyati ham qayd etildi. Ikkala mamlakatning turizm vazirliklari jalb qilingan holda bu masala atroflicha muhokama qilindi, — deydi Oliy Majlis Senati raisining birinchi o‘rinbosari Sodiq Safoyev.