Демократик партиядан 30 нафар конгрессмен АҚШ президенти Жо Байденга Россия билан тўғридан-тўғри мулоқот бошлаш ҳақидаги таклифдан иборат хатини қайтариб олди, деб ёзади Meduza.
Мактуб муаллифларидан бири Прамила Жаяпал маълум қилишича, у бир неча ой олдин ёзилган ва тегишлича текширилмасдан туриб, ходимлар томонидан эълон қилинган.
Жаяпалнинг сўзларига кўра, республикачилар сайловларда ғолиб чиққан тақдирда, Украинага кўмак ҳажми қисқартирилиши ҳақида яқинда берган баёноти фонида ушбу хатнинг эълон қилиниши бемаврид бўлган. Демократлар «украин халқига берилаётган ҳар битта ёрдам пакетини қатъий ва бир овоздан қўллаб-қувватлайди», мактубдан эса бунинг акси тушунилиши мумкин, деди у.
Хатда Украинага мисли кўрилмаган ҳарбий ва молиявий ёрдам кўрсатаётган Байден «ўт очишни тўхтатишга реал асос» топиш учун Россия билан бевосита музокараларни ҳам бошлаши кераклиги айтилганди. Уларнинг таъкидлашича, дипломатик ечимдан бошқаси «ҳалокатли ва ақл бовар қилмайдиган хавфлар» билан «узоққа чўзилган уруш»ни англатади.
Оқ уй АҚШ Давлат департаменти конгрессменларнинг мурожаатига изоҳ берар экан, Жо Байден ҳали Россия билан тўғридан-тўғри музокаралар ўтказиш ғоясини қўллаб-қувватламаётганини маълум қилди.
Изоҳ (0)