Bayden koronavirusga qarshi uchinchi buster vaksina bilan emlandi

AQSH prezidenti Jo Bayden 25-oktabr kuni koronavirusga qarshi uchinchi buster (kuchaytiruvchi) vaksinani oldi.

“Qani, davom ettiraylik. COVID-19 ga qarshi kuzgi dozani oling, grippga qarshi emlaning, bu oson”, — dedi u vaksina olishidan oldin.

Uning aniqlik kiritishicha, amerikaliklarning ko‘pchiligi uchun yiliga bitta doza yetarli bo‘ladi.

Bayden o‘z prezidentlik davri boshidan buyon AQSHda COVID-19 bilan kasallanganlar soni 80 foizga, koronavirus infeksiyasi tufayli vafot etganlar soni esa 90 foizga kamayganini eslatdi. U bunday ko‘rsatkichlar sog‘liqni saqlash tizimi faoliyati natijasi ekanini ta’kidlab, Kongressni virusga qarshi kurashish uchun qo‘shimcha mablag‘ ajratishga chaqirdi.

Avvalroq prezident COVID-vaksinasining yangilangan dozasini olishi ma’lum qilingandi, bu esa ayni paytda AQSHda eng ko‘p tarqalgan omikron shtammining BA.4 va BA.5 subvariantlariga qarshi ishlab chiqilgan. 20 milliondan ortiq amerikaliklar allaqachon yangilangan vaksinani olgan.

Bayden shu yilning mart oyi oxirida koronavirusga qarshi ikkinchi buster dozani olgan edi. Shundan so‘ng u ikki marta koronavirus bilan kasallangan.