Atom energiyasi bo‘yicha xalqaro agentlik (MAGATE) Kiyevning so‘rovi bilan tekshiruv o‘tkazish uchun yaqin kunlarda Ukrainaning ikkita yadro obyektiga o‘z inspektorlarini yuboradi. Bu haqda tashkilot bosh direktori Rafael Grossi ma’lum qildi.
Uning aytishicha, ikkala obyektga ham MAGATE xodimlari muntazam borib turadi, bu safar inspeksiya yashirin yadro faoliyati va materiallari bor-yo‘qligini tekshirishga taalluqli bo‘ladi.
“Bir oy avval MAGATE bu joylardan birini tekshiruvdan o‘tkazgandi, va bizning barcha xulosalarimiz Ukrainaning xavfsizlik bo‘yicha vaziyat haqidagi deklaratsiyalari bilan muvofiq keladi… U yerda hech qanday maxfiy yadroviy faoliyat va materiallar aniqlanmagan”, — deya qo‘shib qo‘ydi Grossi.
AQSH MAGATEning tekshiruv o‘tkazish haqidagi qarorini qo‘llab-quvvatlaydi, dedi Oq uy vakili Karin Jan-Pyer.
“Iflos bomba” atrofidagi mojaro
24-oktabr kuni Rossiya tomoni Ukrainadagi ikkita tashkilotga “iflos bomba” yaratish bo‘yicha aniq topshiriqlar berilgani, ishlar yakuniy bosqichda turganini ma’lum qildi. Rossiya Qurolli kuchlari radiatsiyaviy, kimyoviy va biologik himoya qo‘shinlari boshlig‘i general-leytenant Igor Kirillov so‘zlariga ko‘ra, Ukraina o‘z AESlarida, konchilik korxonalarida “iflos bomba” uchun xomashyoga ega, bundan tashqari, Kiyev va Xarkovda ilmiy bazasi ham bor.Shundan keyin Ukraina Tashqi ishlar vazirligi MAGATEga mamlakatga o‘z inspeksiyasini yuborishni taklif qildi. “Yashiradigan hech narsamiz yo‘q”, — dedi vazir Dmitriy Kuleba.
23-oktabr kuni mudofaa vaziri Sergey Shoygu NATOning to‘rtta davlatidagi hamkasblari bilan bog‘lanib, Ukraina “iflos bomba” yordamida “provokatsiya”ni rejalashtirayotganini aytdi. Ukraina “iflos bomba” haqidagi xabarlarni yolg‘on deb atadi. Prezident Vladimir Zelenskiy Ukrainada bunday bombadan faqat Rossiya foydalanishi mumkinligini aytdi.
G‘arb davlatlari fikricha, Rossiyaning “iflos bomba” haqidagi ogohlantirishlari yangi eskalatsiya uchun bahona. “Ukraina o‘z hududida iflos bomba qo‘llashga tayyorlanayotgani haqidagi Rossiyaning ochiqdan ochiq yolg‘on da’volarini barchamiz rad etamiz”, — deyiladi Fransiya, Buyuk Britaniya va AQSH tashqi ishlar vazirlari qo‘shma bayonotida.
“Iflos bomba” — radioaktiv moddalardan tarkib topgan, biroq oddiy portlovchi moddaga asoslangan, ya’ni mustaqil yadroviy reaksiyaga qodir bo‘lmagan faraziy portlovchi qurilma. “Iflos bomba” odatda terroristik hujumning ehtimoliy turlaridan biri deb hisoblaniladi.
Mavzuga doir:
- “Kiyev ‘iflos bomba’dan foydalanmoqchi emas” — NATO bosh kotibi Rossiyaning iddaolarini bema’nilik deb atadi
- Rossiya Bosh shtabi rahbari “iflos bomba” tufayli AQSH va Britaniya harbiy amaldorlariga qo‘ng‘iroq qildi
- Shoyguning NATO mudofaa vazirlariga qo‘ng‘iroq qilishdan maqsadi Ukrainaga yordamni to‘xtatib qo‘yish bo‘lgan
Izoh (0)