Qozog‘iston prezidenti Qosim-Jo‘mart To‘qayev respublika Harbiy doktrinasiga o‘zgartirishlar kiritish to‘g‘risidagi farmonni imzoladi. Bu haqda mamlakat Mudofaa vazirligi xabar berdi.
“Hujjatga harbiy-siyosiy va harbiy-strategik sohalardagi faoliyatning yangi yo‘nalishlari, harbiy sohadagi normativ-huquqiy hujjatlarni tizimlashtirish va harbiy rejalashtirish tizimini joriy qilish bo‘yicha chora-tadbirlar kiritildi”, — deyiladi xabarda.
Bundan tashqari, yangilangan doktrina Maxsus operatsiyalar bo‘linmalarini rivojlantirish va ularning boshqa davlat organlari maxsus topshiriqli bo‘linmalari bilan o‘zaro hamkorligini kengaytirishni ko‘zda tutadi.
Harbiy doktrinaning yangi tahriri davlatning harbiy xavfsizlik va mudofaani ta’minlash bo‘yicha qarashlarini zamonaviy talablar va sharoitlarga moslashtirish imkonini beradi, shuningdek, mamlakatning yangi tahdidlar va xavflarga muvofiq javob ko‘rsatish bo‘yicha salohiyatini oshiradi, deya qayd etdi Mudofaa vazirligi. Hujjatning o‘zi 12-oktabrdayoq e’lon qilingandi.
U, shu jumladan, axborot-psixologik va dasturiy-texnik (kiber) ta’sirlarga qarshi kurash uchun bo‘linma tuzishni nazarda tutadi, shuningdek, Qurolli kuchlar tarkibida hududi mudofaa boshqaruvi organini tuzadi.
Doktrinada ta’kidlanishicha, Qozog‘iston hech bir davlatni dushman deb hisoblamaydi. Joriy vaziyat tahliliga bag‘ishlangan bo‘limda aytilishicha, jahondagi harbiy-siyosiy muhit taraqqiyotning yuqori dinamikligi va kutilmagan natijalari, dunyo va mintaqa davlatlari o‘rtasida ta’sir sohalari uchun kurashning kuchayishi, shuningdek, davlatlararo va davlat ichidagi ziddiyatlarni hal qilishda harbiy kuch rolining o‘sishi bilan tavsiflanadi.
Qozog‘iston xavfsizligi uchun asosiy tahdidlar orasida “dunyoda ommaviy qirg‘in quroli hajmining oshishi, shuningdek, yangi fizik tamoyillar asosiga qurilgan ommaviy ta’sir qurolining yaratilishi” tilga olingan. Respublikaning harbiy-siyosiy sohadagi faoliyatining asosiy yo‘nalishlari haqidagi band esa “global va mintaqaviy xavfsizlik tizimlarini takomillashtirish maqsadlarida boshqa davlatlar va xalqaro tashkilotlar bilan hamkorlikni mustahkamlash” haqidagi nizom bilan to‘ldirilgan.
Bundan tashqari, yangilangan hujjatda Qozog‘istonning tinchlikparvarlik faoliyati bilan bog‘liq chora-tadbirlar ro‘yxati kengaytirilgan.
Izoh (0)